Жібек жолын жаңғырта аламыз ба?
Елордалық туризм қауымдастығының президенті, шежірелі Жібек жолын жаңғырту қадамы елдегі туристік саланың брендіне айналады деп есептейді
Елордалық туризм қауымдастығының басшысы Рысты Қарабаева Астанада өткен Қазақстан-Қытай форумында баяндама жасады. «Біз Қытай туристерін немен қызықтыра аламыз? Менің ойымша, біздің брендіміз Жібек жолы – Қазақстан бола алады. Егер Жібек жолы дәліздерін қарап отырсаңыз, 2014 жылдан бері Қазақстан арқылы Чанъань-Тянь-Шань дәлізі өтеді. Егер Жібек жолының сауда нарығына қарасақ, ол жақта Қазақстан мүлде болмағандай: Қазақстанға соқпай өтетін Қырғызстан, Өзбекстан біріктірілген бағыты жүріп өтеді, одан ары қарай Қытай. Осы олқылықтың орнын толтырып, Жібек жолындағы өзімізге тиесілі орынды иемденетін кез келді деп ойлаймын», – деп мәлімдеді ол.
Қарабаеваның айтуынша, Жібек жолының қазақстандық дәлізінде көне қалалар өте көп. Олар Жетісуда, Таразда, және Алматы облысында орналасқан. Олардың көбі ЮНЕСКО-ның мәдени мұраларының тізіміне енген. «Аталған қалаларды көріктендіріп, туристік бағыттарға қосу қажет», – деді қауымдастық басшысы.
Сонымен қатар форумда сөз алған Шығыс Қазақстан облысы әкімдігі туризм басқармасының басшысы Жасұлан Сәрсебаев жыл сайын Астанада Жібек жолының Экономикалық белдеуіне қатысушы елдердің туристік формудары мен көрмелерін өткізіп тұруды ұсынды. «Жібек жолының Экономикалық белдеуін құру туралы идеяны Син Цзиньпин мырза 2013 жылы алғаш рет Астанада айтқандығын атап өтуіміз қажет. Қытайдың сыртқы саясатын түсінеміз, олар үшін Жібек жолын жандандыру стратегиялық жағынан маңызды. Осы әріптестікті жандандыру үшін бізге мұндай шараны Астанада өткізу тиімді», – деді ол.
Талқылауда модератор болған «Атамекен» ҚР ҰКП Басқарма төрағасының орынбасары Юлия Якупбаева осы ұсынысты форумның қарарына қосуға уәде берді.
Пікір қалдыру:
Пікірлер: