Жергілікті билік кәсіпкерлік саласының дамуын қолдайды
Маңғыстау облысы кәсіпкерлер палатасында облыс әкімі Серікбай Трұмов бизнес өкілдерімен кездесті. Өңірлік кеңес мүшелерімен басқосуда кәсіпкерлерге қолбайлау болып отырған өзекті мәселелер талқыланып, оларды шешу жолдары айтылды
Өңірлік кәсіпкерлер палатасының директоры Нұрбек Қарасаев елді мекендерде скрининг жүргізу аудан әкімдерінің қатысуымен белсенді жүріп жатқанын баяндады. Сонан соң кәсіпкерлерге жер, ондағы коммуникация жайы көрсетілген ақпаратты жария түрде алудаа қиындықтар туындағанын жеткізді. Мұннан бөлек кәсіпкерлерге қызмет көрсету орталығын жергілікті бюджет есебінен қаржыландыру жолын ұсынды. Мамандыққа даярлау саласын да кәсіпкерлер палатасы сенімгерлікпен басқаруға дайын екенін атап өтті.
«Облыстағы 16 колледждің 7-уі сенімгерлікпен басқаруға болатындығы жөнінде білім басқармасымен бірлесіп талдау жүргіздік. Бұл мемлекет шығынын үнемдеуге көп көмегін тигізеді»,– деді ол.
Маңғыстау облысының әкімі Серікбай Трұмов:
«Кәсіпкерлерге қызмет көрсету орталығын қаржыландыру жағын қарастырамыз. Кәсіпкерлер мәселесін бірлесіп шешуге дайынбыз. Колледждерде мамандық дайындауға келер болсақ, жұмыссыздықты азайту жағынан септігін тигізсе, сұранысқа ие мамандарды қайта даярлауға серпін берсе бұдан ұтпасақ, ұтылмаймыз. Сондықтан да ұсыныстарыңызды қолдаймыз», – дейді.
Сонан соң облысқа белгілі кәсіпкерлер сөз алып, шешімін таппаған жайттарды ортаға салды. МО Кәсіпкерлер палатасы жанындағы Іскер әйелдер кеңесінің төрайымы Сәуле Салихова салт-дәстүрдің қаймағы бұзылмаған Маңғыстауда қолөнершілер орталығын ашу туралы ұсыныс айтты. Сонда маңғыстаулық бай нақышпен жасалатын қолөнер бұйымдары бір орталықта жасалып, өнімдер саудаға да шығарылмақ.
«Облыста киіз үй жабдығын тігетін алдыңғы буыннан 4 қана шебер қалды. Олардың жасы 60-тан асып барады. Солардың білетін мол мұрасын, киіз басу, басқұр, ши тоқу және басқа да бұйымдарды жасауды жастарға үйрететін шеберлік мектебі ашылса. Сонда шеберлердің әрқайсысы мыңдаған шәкірт тәрбиелеп, Маңғыстау мұрасын ұрпақтан ұрпаққа жеткізетін ізбасарлар толқыны үзілмес еді»,– деп ой тастыды.
Кездесу барысында кәсіпкерлер жер, құрылыс, туризм саласын дамыту, әйелдер кәсіпкерлігін жетілдіру, жергілікті өнімді тұтыну сынды маңызды мәселелерді қозғады. Облыс басшысы қашан да өңір дамуы үшін тиімді жобаларды қолдауға дайын екенін қадап айтты.
Бұл қолдау облыста қызмет ететін 114 мыңнан астам адам орта және шағын бизнес саласы өкілдеріне үлкен серпін береді. Өңірдегі бизнес нысандары 53 мыңға жетіп қалды. Бұл кәсіпкерлер қатарының өткен жылмен салыстырғанда 9,5% артқанын көрсетеді.
Пікір қалдыру:
Пікірлер: