Астанада Қытай тауарларының жыл сайынғы 19-көрмесі өтуде
Астанада Қазақстан мен Қытай арасындағы сауда-экономикалық байланысты нығайту мақсатында ұйымдастырылған Қытай тауарларының жыл сайынғы 19 – көрмесінің ашылуы өтті. Қазақстанның Сыртқы сауда палатасының қолдауымен ұйымдастырылған шара Қытайдың жетекші провинцияларынан экономиканың түрлі салаларында жұмыс істейтін 300-ге жуық орта және ірі бизнес өкілінің басын қосты.
Ашылу салтанатына Қазақстан Республикасы Сауда және интеграция вице-министрі Қайрат Төребаев, ҚР Сыртқы сауда палатасының төрағасы Мұрат Қарымсақов, Қытай Халық Республикасының Қазақстан Республикасындағы Елшісі Чжан Сяо және Шаньдун провинциясының өнеркәсіп және сауда басқармасы Федерациясының төрағасы, Шаньдун провинциясының Сауда палатасының президенті Ван Суй Лян қатысты.
.jpg)
ҚР Сыртқы сауда палатасының Басқарма төрағасы Мұрат Қарымсақов Қазақстан мен Қытай арасындағы өзара құрмет пен тату көршілікке негізделген ұзақ мерзімді ынтымақтастықтың маңыздылығына тоқталды. Ол Қазақстан мен Қытай арасындағы теміржол тасымалы айтарлықтай өскенін, бұл екіжақты ынтымақтастықты дамытудағы көлік инфрақұрылымының маңыздылығы екенін жеткізді.
«Қытай Қазақстанның негізгі сауда серіктесіне айналды, ал елдер арасындағы тауар айналымы 2023 жылы 31,48 миллиард АҚШ долларын құрады, бұл өткен жылмен салыстырғанда 30%-ға артық. Бұл көрсеткіш екіжақты экономикалық қарым-қатынастың қарқынды дамып келе жатқанын көрсетеді», – деді Мұрат Қарымсақов.
Бұған қоса, Алматы облысында қытайлық компанияның қатысуымен «Бұғыты» вольфрам кен орнын игеру және құны 135 миллиард теңгені құрайтын тау-кен байыту комбинатын салу жобасы жүзеге асырылуда. Жоба 350 жұмыс орнын ашады және 2024 жылға дейін аяқталады.
Сонымен қатар, ауыл шаруашылығы, логистика, өнеркәсіп және энергетика салаларындағы жобаларға ерекше назар аударылды. Мәселен, Қазақстан Қытайға астық экспортын 3 миллион тоннаға дейін арттыруға, сондай-ақ қытайлық компаниялардың қатысуымен вольфрам кен орындарын игеру, керамикалық зауыттар салу, жүк көліктерін құрастыру жобаларын жүзеге асыруға дайын.
Қытай Халық Республикасының Қазақстан Республикасындағы Елшісі Чжан Сяо Қазақстан жыл өткен сайын барлық хабтар, көліктік және логистикалық желілер өтетін жоғары дамыған өңір мәртебесіне ие болып келе жатқанын атап өтті.
«Аграрлық технология, электротехника және басқа да көптеген салаларды қоса алғанда, 230-дан астам түрлі өнімді ұсынған бұл көрмеге әртүрлі провинциялардың компаниялары қатысуда. Бұл осы жылдар ішінде қол жеткізген тығыз ынтымақтастық пен өзара іс-қимылдың нәтижелерін тағы бір рет көрсетіп, елдеріміз арасындағы әлеуетті тағы да толық ашып көрсетеді деп ойлаймын», - деді Қазақстандағы Қытай елшісі.
.jpg)
Қытай тауарларының Қазақстандағы бұл көрмесі Астанада алғаш рет өткізіліп отыр және қатысушыларға перспективалық жобаларды талқылауға, келісімдерге қол қоюға және экономикалық ынтымақтастықты дамытудағы жаңа қадамдарды белгілеуге мүмкіндік береді. Көрме Республика астанасында 23-25 тамыз аралығында өтеді.
Мұрат Қарымсақов бірлескен күш-жігердің арқасында Қазақстан мен Қытай сауда-экономикалық байланыстарын айтарлықтай нығайтып, жаңа ауқымды жобаларды жүзеге асыра алатынына сенім білдірді.
Пікір қалдыру:
Пікірлер: