Райымбек Баталов бизнеске арналған жаңашыл идеяларды ұсынды
«Атамекен» Ұлттық кәсіпкерлер палатасы Төралқа Төрағасы Райымбек Баталов бизнеске Қазақстандағы шағын және орта бизнес үшін серпіліс бола алатын жаңа бастамаларды Parasat Business Club ұйымдастырған іскерлік таңғы аста таныстырды. Аталмыш отырыстың модераторы қазақстандық кәсіпкер Арманжан Байтасов болды.
ШОБ жаңа экожүйесі: бизнесті «көлеңкеден» шығару
Кездесуде кәсіпкерлікті дамытуға және оны жаңа деңгейге көтеруге бағытталған ШОБ қолдау экожүйесін құру мәселесі талқыланды. Еліміздегі шағын бизнестің негізгі проблемаларының бірі – оның айтарлықтай бөлігі «көлеңкеде» жұмыс істейтінін айта кеткен жөн. Бұл олардың бәсекеге қабілеттілігін төмендетеді және мемлекеттік қолдау шараларына қолжетімділікті шектейді.
«Біз Палатаның шешім қабылдау процестеріне етене қатысқанын қалаймыз. Біз қызмет үлгісін құрудамыз, бизнес моделін біріктіреміз, бұл өте маңызды. Бұл цифрлық экожүйе болуы керек, оның басты мақсаты тек кәсіпкерлікті дамыту ғана емес, оны экономиканың тұрақты күшіне айналдыру», - деді Баталов.
Экожүйе – бизнес-инкубаторлар мен акселераторларды құрудан бастап, кәсіпкерлерге өсу үшін қажетті ресурстар мен инфрақұрылымға қолжетімділікті қамтамасыз ететін индустриялық аймақтарға дейінгі қолдау шараларының тұтас кешенін ұсынады. Экономиканың ең осал, алайда, стратегиялық маңызды секторы ретінде микро және шағын бизнеске ерекше назар аударылады.
Кәсіпкерлерге қолайлы – кәсіпкерлік субъектілерінің тізілімі
Іскерлік таңғы аста ұсынылған жаңалықтардың бірі – мемлекеттік органдарды, бизнес пен аналитикалық деректерді бір жүйеге біріктіретін цифрлық платформа – кәсіпкерлік субъектілерінің тізілімі болды. Тізілім бизнеске өз қызметін оңай тіркеуге және қолдау бағдарламалары туралы ақпарат алуға, құрылған жұмыс орындарының санын және төленген салық сомасын қадағалауға мүмкіндік береді. Бұл бизнес үшін де, мемлекеттік органдар үшін де деректерді қолжетімді және ашық етеді.
Жаңа Тізілімнің маңызды ерекшелігі кәсіпкерлердің кері байланысқа қатысу және мемлекеттік қолдау шаралары бойынша өз ұсыныстарын тұжырымдау мүмкіндігі болмақ. Бұл құрал бизнеске мемлекеттік шешімдер деңгейінде тыңдауға мүмкіндік береді және жаңа бағдарламалардың қалыптасуына әсер етеді.
ЕҚҮ әдістемесі және ОТӨ үшін артықшылықтар
Отырыста ұсынылған тағы бір маңызды бастама – тауарлар мен қызметтердің елішілік құн үлесін (ЕҚҮ) есептеудің жаңа әдістемесі. Бұл тәсіл қазақстандық компаниялардың ұлттық экономиканы дамытуға қосқан үлесін шынайы бағалауға және жергілікті ресурстарды белсенді пайдаланатындарға қолдау көрсетуге мүмкіндік береді.
«Біздің жүйе ЕҚҮ деңгейі жоғары компанияларды шынымен қолдауға мүмкіндік береді. Олар айтарлықтай преференцияларға ие болады: сатып алу платформасын пайдаланғаны үшін тарифтерден босату, келісім-шарттар жасау кезінде міндетті аванстық төлем және келісім-шарт талаптарын бұзғаны үшін айыппұлдарды азайту», - деп түсіндірді Баталов.
Бұл бастама ел ішіндегі өндірісті ынталандырып қана қоймайды, сонымен қатар, мемлекеттік сатып алуда жалған мәліметтер беретін жосықсыз өндірушілермен күресуге бағытталған.
Сондай-ақ, спикер Ұлттық палата соңғы бір жарым жылда бизнес қауымдастығымен бірлесіп заңнамаға ұсынған 1,5 мың түзету қабылданғанын атап өтті. Өзгерістер Қазақстандағы бизнес-ортаны жақсартудағы маңызды қадам болды. Бұл бастамалар мен жетістіктер «Атамекен» ҰКП былтырғы жылғы жаңартудың нәтижесі. Осылайша қызметкерлердің 30 пайызы оңтайландырылып, Палата жұмысының бағыттары түзетілді.
Райымбек Баталовтың ұсынған жаңалықтары – жай ғана қолдау бағдарламалары емес, шағын және орта бизнесті жаңа деңгейге көтеруге арналған кешенді шешім.
ШОБ экожүйесі, кәсіпкерлік субъектілерінің тізілімі және ЕҚҮ әдіснамасы ашықтықты, тұрақты өсуді және жергілікті және халықаралық деңгейде бизнестің бәсекеге қабілеттілігін қамтамасыз ете отырып, алға жетелейтін қадам болып табылады.
Шағын және орта бизнес өркендеуге мүмкіндік беретін құралдарға ие болады. «Аталмыш жобалар цифрлық, ашық және жаңа болашақтың бір бөлігі болуға дайын адамдар үшін мүмкіндіктерге толы», - деп атап өтті Райымбек Баталов.
Пікір қалдыру:
Пікірлер: