Неміс делегациясы Қарағанды құю-машина жасау зауытының өндірістік әлеуетін бағалады
Бүгін Қарағандыда Герман-Еуразиялық экономикалық одақ (ГЕЭО) делегациясының Қарағанды құю-машина жасау зауытына (ҚҚМЗ) сапары өтті. Сапар барысында неміс компанияларының өкілдері зауыттың өндірістік қуатымен танысып, Қарағанды облысы кәсіпкерлер палатасы ұйымдастырған машина жасау кеңесінің отырысына қатысты.
ҚҚМЗ бойынша экскурсия кезінде коммерциялық директор Светлана Алексеева неміс делегациясына «Maker» Қарағанды құю-машина жасау зауытының өндірістік мүмкіндіктерін таныстырды. Зауыт 5 000-нан астам өнім түрін шығарады. Олардың ішінде шахталарды жабдықтауға арналған техника, кен тасымалдау жабдығы, өту жабдықтары, қуатты гидравлика, жүк көтергіш крандар мен вагон төңкергіштер бар.
«Біздің зауыт әртүрлі өнеркәсіп салаларына арналған озық шешімдер ұсынады. Біз неміс әріптестерімізбен ынтымақтастық жаңа мүмкіндіктерге жол ашып, әрі қарай өсу мен дамуға серпін беретініне сенімдіміз», — деп атап өтті Алексеева.
.jpeg)
Кеңес отырысын Қарағанды облысы кәсіпкерлер палатасы директорының орынбасары Ерлан Қалиев ашты, ол Қазақстан мен Германия арасындағы екіжақты байланыстарды нығайтудың маңыздылығын атап өтті.
«Германиямен сауда-экономикалық байланыстарды орнату біз үшін өте маңызды. Біз аймақ кәсіпорындарының кооперацияны дамытып, технологиялық прогресс пен бәсекеге қабілеттілікті арттыруға ықпал ететін бірлескен жобаларды іске асыруға деген ұмтылысын қолдаймыз», — деді Ерлан Қалиев.
.jpeg)
Кеңес отырысында қазақстандық және неміс компаниялары өздерінің мүмкіндіктері мен жетістіктерін көрсете отырып, презентация жасады. Қазақстан тарапынан өңдеу секторының кәсіпорындары өздерінің әзірлемелері мен өнімдерін ұсынды, ал машина жасау, металды өңдеу, ауыл шаруашылығы және басқа да салаларда жұмыс істейтін неміс компаниялары өнеркәсіптік процестерге арналған инновациялық шешімдерді ұсынды.
Машина жасау кеңесінің мүшесі, «Инкар-1» ЖШС басшысы Қуандық Нұрпеисов аймақтың әлеуетін таныстырды.
«Қарағанды облысы – Қазақстанның жетекші өнеркәсіптік өңірлерінің бірі, және біз заманауи технологияларды енгізуге және бірлескен жобаларды іске асыруға дайынбыз, бұл бізге халықаралық нарықтарға шығуға мүмкіндік береді», — атап өтті Қуандық Балтабайұлы.
Герман-Еуразиялық экономикалық одақ президенті доктор Томас Овербек те ынтымақтастықтың зор әлеуетін атап өтті.
«Қазақстандық кәсіпорындардың даму деңгейіне біз ерекше әсер алдық және өзара тиімді серіктестік үшін үлкен мүмкіндіктерді көріп отырмыз. Біз өндіріс процесін жақсартуға және кәсіпорындарды жаңа деңгейге шығаруға көмектесетін озық технологияларды ұсынуға дайынбыз», — деді Овербек.
.jpeg)
Отырыс аяқталған соң қатысушылар В2В кездесулер өткізіп, бірлескен жобаларды іске асыру перспективаларын талқылап, Қазақстан мен Германия арасындағы машина жасау саласындағы іскерлік қатынастарды дамыту бойынша алдағы қадамдарды белгіледі.
Пікір қалдыру:
Пікірлер: