Қарағанды облысында жас шебер жүн өңдеу цехын ашты
17 жастағы қарағандылық Гүлпахат Құттыбаева жүн өңдеу цехын ашты. Бұл жоба облыс әкімінің бірыңғай кешенді кәсіпкерлікті қолдау бағдарламасы аясында бөлінген гранттың арқасында жүзеге асырылды.
Бизнес-жоспарды дайындау және құжаттарды рәсімдеу үшін Гүлпахат Қарағанды облысының Кәсіпкерлер палатасына жүгінді. Палата мамандары оған жобаны дұрыс әзірлеуге және конкурсқа табысты қатысуға көмектесті. Сонымен қатар, Гүлпахат Кәсіпкерлер палатасы ұйымдастырған «Бір ауыл – бір өнім» байқауына қатысып, финалистер қатарынан көрінді.
.jpeg)
Гүлпахат алған 5 миллион теңгені заманауи жабдықтарды, соның ішінде түту және басу станоктарын сатып алуға жұмсады. Бұл оған өндіріс көлемін ұлғайтып, өнім ассортиментін кеңейтуге мүмкіндік берді.
«Мен алты жыл бұрын алғаш рет Достық үйіндегі шеберлік сабағына қатысқанымда, киіз басуға қызығушылық таныттым. Қазір Камаш-апай сияқты тәжірибелі шеберден тәлім алып, өзімнің шеберлігімді одан әрі жетілдіріп жатырмын», – дейді Гүлпахат.
.jpeg)
Қазіргі таңда Гүлпахат киізден кілемдер, картиналар, көрпелер дайындаумен айналысады. Ал жаңа жабдықтардың көмегімен ол жүннен көрпелер, киімдер мен аяқ киімдер шығаруды жоспарлап отыр. Шикізат ретінде жергілікті фермерлерден алынған табиғи жүнді пайдаланады. Бүгінде оның киіз бұйымдары кафе мен мейрамханаларды безендіріп, тіпті Франция мен Түркиядан келген сатып алушылар тарапынан мойындалды.
Гүлпахаттың жобасы Кәсіпкерлер палатасының кәсіпкерлерге даму жолында көрсетіп отырған қолдауының жарқын мысалына айналды. Палата бизнеске барлық кезеңдерде қолдау көрсетуді жалғастырып келеді.
Пікір қалдыру:
Пікірлер: