Астана - Мадрид. Екі ел экономикалық іскерлік қарым-қатынастарды нығайтты
2025 жылғы 18 наурызда Испания астанасы Мадрид қаласында 8-ші Қазақстан-Испания іскерлік кеңесінің отырысы өтті. Бұл кездесу екі ел арасындағы сауда-экономикалық байланыстарды дамытудағы маңызды қадам болды. Іс-шараға мемлекеттік органдардың, бизнес және қаржы институттарының жоғары лауазымды өкілдері қатысты.
Қазақстан тарапынан отырысқа ҚР Сауда және интеграция вице-министрі Қайрат Торебаев, Қазақстанның Сыртқы сауда палатасының төрағасы Мұрат Қарымсаков, сондай-ақ ірі компаниялар мен инвестициялық қорлардың басшылары қатысты. Испания тарапынан Сауда жөніндегі мемлекеттік хатшы Ампаро Лопес Сеновилья, Испания Сауда палатасының бас директоры Инмакулада Риера және CEOE International президенті Марта Бланко қатысты.
Құттықтау сөзінде Қазақстанның Сыртқы сауда палатасының төрағасы Мұрат Қарымсақов Қазақстан мен Испанияның сауда айналымын ұлғайту және негізгі салаларда бірлескен инвестициялық жобаларды жүзеге асыру үшін айтарлықтай әлеуетке ие екенін атап өтті.
.jpeg)
“Жаңа бизнес мүмкіндіктері” панельдік сессиясы барысында бизнес өкілдері даму бағыттарын талқылады. Ерекше назар инфрақұрылым, энергетика, ауыл шаруашылығы өнімдерін өндіру, тоқыма өнеркәсібі және кәсіпкерліктің цифрлық трансформациясына инвестиция салуға аударылды.
Қазақстанның Ұлттық цифрлық инвестициялық платформасы жеке таныстырылды. 2025 жылғы 1 ақпаннан бастап ол халықаралық инвесторларға қолжетімді болды. Қазіргі уақытта бұл платформада 77 млрд АҚШ долларын құрайтын 886 жоба тіркелген. Бұл құрал инвестициялық мәмілелердің ашықтығын қамтамасыз етіп, бизнес өкілдерімен тиімді өзара әрекеттесуге ықпал етеді.
Қазақстанда испан капиталы бар ондаған компаниялар тіркеліп, белсенді жұмыс істеп жатыр. Олардың ішінде Airbus Defense & Space, Glovo, Técnicas Reunidas, Maxam, Grupo Anka, Roca, Inditex, Pronovias, Mango, Joma және басқалары бар. Бұл компаниялар аэро-геофизикалық зерттеулер, қорғаныс өнеркәсібі, теміржол машина жасау, киім өндірісі және қызмет көрсету салаларында жобаларға қатысуда.
2023 жылы Xcalibur Multiphysics Group пен Қазақстанның Ұлттық геологиялық қызметі арасында ынтымақтастық туралы келісімге қол қойылды, бұл жоғары технологиялық салалардағы табысты өзара іс-қимылдың үлгісі болып табылады.
“Силлено” стратегиялық жобасы аясында полиэтилен өндірісі дамып, Қазақстанның мұнай-газ химиясы саласына жаңа перспективалар ашылуда.
Отырыстың қарсаңында Испанияның экспорттық-несиелік агенттігі CESCE мен KazakhExport компаниясы арасында ынтымақтастық туралы меморандумға қол қойылды. Бұл келісім екі ел арасындағы сауданы қаржылық қолдау құралдарын нығайтуға бағытталған.
Отырысты қорытындылай келе, Мұрат Қарымсақов Қазақстан шетелдік инвестициялар үшін “ашық есік” саясатын ұстанатынын, кәсіпкерлер үшін тұрақты жағдайлар, салықтық жеңілдіктер және бизнес-қорғау шараларын қамтамасыз ететінін атап өтті.
Қазақстандық делегация ынтымақтастықты кеңейтуге, B2B және B2G кездесулер ұйымдастыруға, сондай-ақ бірлескен бизнес-форумдар өткізуге дайын екенін білдірді.
Бұл отырыс Қазақстан мен Испания арасындағы сауда-экономикалық серіктестікті нығайтудағы тағы бір маңызды қадам болды. Оның қорытындылары екі ел үшін жаңа инвестициялық жобаларды жүзеге асыруға және бизнес мүмкіндіктерін кеңейтуге ықпал ететін болады.
Пікір қалдыру:
Пікірлер: