Бағаның өсуі және қызметтерге қолжетімділіктің төмендеуі: Қазақстанның медициналық бизнесі жаңа салықтарға алаңдаулы
Медициналық мекемелер үшін салықтық преференцияларды алып тастау Қазақстанда медициналық қызметтер құнының өсуіне және медициналық көмек сапасының нашарлауына әкелуі мүмкін.
Мұндай мәлімдеме «Атамекен» Ұлттық кәсіпкерлер палатасы ұйымдастырған бизнес өкілдері, Парламент Мәжілісі депутаттары мен мемлекеттік орган өкілдерінің кездесуінде айтылды.
Аталмыш мәселеге қатысты ҰКП Төралқасының Фармацевтика, медицина өнеркәсібі мен медициналық қызметтер комитетінің төрағасы Нұржан Отарбаев ойын білдірді. Келтірілген дәлелдерге сәйкес, медициналық көмек түрінде қызметтерге қосылған құн салығын енгізу сөзсіз қаржыландыру көлемінің қысқаруы және ақылы қызметтер құнының өсуі сияқты тәуекелдерге әкеледі. Нәтижесінде пациенттер жеке медициналық қызметтерді пайдалана алмай, мемлекеттік мекемелерге жүгінуге мәжбүр болады, бұл денсаулық сақтау жүйесіне жүктемені едәуір арттырады. Бұл кезектердің өсуіне, кеш медициналық көмекке жүгіну жағдайларының көбеюіне, қажетті емге қолжетімділіктің шектелуіне және соның салдарынан оның сапасының төмендеуіне әкеледі.
«Біз ҚҚС нөлдік мөлшерлеме бойынша сақтауды талап етеміз. Ал ТМККК және МӘМС жүйесі аясында медициналық ұйымдарға сараланған салық енгізу жеке бизнестің барлық құқықтарын бұзады», - деп атап өтті ҰКП өкілі.
«КДЛ ОЛИМП» ЖШС Бас директоры Ерлан Сүлейменов дәрі-дәрмектер мен медициналық бұйымдарды сатуға және импорттауға ҚҚС енгізу осы тауарларға бағаның орта есеппен 20%-ға өсуіне әкелуі мүмкін, бұл өз кезегінде әлеуметтік шиеленістің өсуіне алып келеді деп алаңдаушылық білдірді.
«Халықаралық тәжірибені де ескеру қажет. Дамыған елдердің көпшілігінде, атап айтқанда Экономикалық ынтымақтастық және даму ұйымының 91% медициналық қызметтерге ҚҚС мөлшерлемесі 0%-ға тең. Мәселен, Өзбекстанда ҚҚС-тың 12% енгізуден бір жылдан аз уақыт ішінде дәрі-дәрмектерді тұтынудың күрт азаюынан сәйкесінше олардың халыққа қол жетімділігінің төмендеуі анықталған», - деп атап өтті іс-шараға қатысушылар.
«Ұлағат Консалтинг Групп» ЖШС директоры Марат Қайырленов жаңа салық – 10% мөлшеріндегі корпоративтік табыс салығын құрудың қосымша тәуекелдерін атап өтті. Ол созылмалы жеткіліксіз қаржыландыру және кредиторлық берешектің қарқынды өсуі жағдайында мұндай өзгерістер медициналық ұйымдардың қаржылық тұрақтылығына елеулі нұқсан келтіруі мүмкін екендігіне назар аударды. Егер 2022 жылы саладағы кредиторлық берешек 43 млрд теңгені құраса, 2024 жылға қарай ол 157 млрд теңгеге дейін ұлғайды.
Сонымен қатар, фармацевтикалық субстанцияларды, материалдарды, дәрі-дәрмектер мен медициналық бұйымдарды өндіруге арналған жабдықтар мен компоненттерді сатуға және импорттауға ҚҚС енгізу отандық өнімнің өзіндік құнының қымбаттауына әкеледі. «ФармМедИндустрия Қазақстан» қауымдастығының атқарушы директоры Гүлдария Манақпаева айтқандай, ДД/МБ өндірісі үшін қажетті шикізаттың шамамен 70-80% импортталады, бұл осы компоненттерге ҚҚС-тың өсуі түпкілікті өнімнің құнына әсер ететінін білдіреді.
Сонымен қатар, медициналық бизнес өкілдері Үкімет ұсынған инновациялар денсаулық сақтау инфрақұрылымының дамуын тоқтата тұруы мүмкін екенін ескертеді. 2022 жылы медициналық қызметте пайдаланылатын объектілердің тозу деңгейі 57,2%, ал жабдықтардың тозуы орта есеппен 66,3% құрады.
Осылайша, ҚР ҰКП Фармацевтикалық және медициналық қауымдастықтың өкілі бола отырып, жаңа салық шараларынан болатын тәуекелдерді азайту үшін денсаулық сақтау саласындағы қолданыстағы салықтық жеңілдіктерді сақтауды сұрайды.
Айта кетейік, мемлекеттік органдармен және Мемлекет басшысымен кездесулерде бизнес медициналық мекемелер үшін салықтық преференцияларды сақтау мәселесін көтерген болатын. Нәтижесінде денсаулық сақтау саласы үшін салықтық жеңілдіктерді сақтау бөлігіндегі түзетулер ҚР Парламенті Мәжілісінен ҚР Үкіметіне жіберілді.
Пікір қалдыру:
Пікірлер: