Ғылыми идеяларды бизнеске ықпалдастыру: ЕҰУ ғалымдары мен кәсіпкерлер бірлескен жобаларды талқылады
Астанада кәсіпкерлер қауымдастығы мен Л.Н. Гумилев атындағы Еуразия ұлттық университетінің ғылыми ортасын біріктірген маңызды жұмыс кездесуі өтті. Іс-шараның басты мақсаты – бизнес пен ғылым арасындағы тиімді өзара іс-қимылды орнату, сондай-ақ ғылыми әзірлемелерді кәсіпкерлердің практикалық қызметіне енгізу мүмкіндіктерін іздеу болды.
Кездесу бизнес пен ғылым саласының негізгі өкілдерін жинады. Қатысушылар қатарында Астана қаласы Кәсіпкерлер палатасының директоры Қанат Әлин, ЕҰУ қаржы және инвестициялар жөніндегі проректоры Назгүл Айдарғалиқызы, факультет декандары, университет ғалымдары және «ENU Lab» ғылыми-техникалық орталығының директоры болды. Сондай-ақ кездесуде Қазақстан экономикасының түрлі салаларында бизнес-процестердің тиімділігін арттыруға негіз бола алатын ғылыми және технологиялық әзірлемелер таныстырылды.
Өнеркәсіптің түрлі салаларына елеулі әсер етуі мүмкін бірқатар инновациялық жобаларға ерекше назар аударылды. Олардың қатарында көмір өндіру саласы, геодезия, теміржол кешені, азық-түлік қауіпсіздігі және жасанды интеллект саласындағы жобалар бар. Кәсіпкерлердің назарын ерекше аударған жобалардың бірі – жасанды интеллектті пайдалана отырып теміржол тасымалдарын болжау жүйесі. Бұл жоба вагондардың бос тұру уақытын қысқартуға және логистиканы жақсартуға мүмкіндік бере отырып, теміржол көлігінің тиімділігін едәуір арттыруға уәде береді. Мұндай технологияларды енгізу көлік саласындағы бизнестің шығындарын азайтып, табысын арттыра алады.
Сонымен қатар кәсіпкерлер тау жыныстарының геомеханикалық жай-күйін зерттеу жобасына қызығушылық танытты. Бұл жоба зерттеулерге кететін шығындарды азайтуға бағытталған және тау-кен кәсіпорындарының қауіпсіздігі мен тұрақтылығын едәуір жақсарта алады. Азық-түлік қауіпсіздігі мәселелеріне де үлкен назар аударылды. Кездесуде ел көлемінен бастап шағын елді мекендерге дейін азық-түлік қауіпсіздігін бақылауға арналған жобалар ұсынылды. Бұл әзірлемелер тамақ саласындағы қауіптерді алдын ала болжауға және бақылауға мүмкіндік беретін тиімді жүйе негізі бола алады.
Сондай-ақ тұрақты даму мен энергия үнемдеуге сай келетін ғимараттарда қайталама су және энергия ресурстарын қайта пайдалану технологиялары талқыланды. Инженерлік құрылыстардың қауіпсіз пайдаланылуына байланысты әзірлемелер мен балық санына баға беру бойынша математикалық модель де кәсіпкерлердің қызығушылығын тудырды. Бұл жобалар табиғи ресурстарды бақылау мен басқаруға инновациялық тәсілдерді ұсынады.
ЕҰУ жанындағы құрылыс инженериясы орталығы – ENU-QURYLYS қызметін ерекше атап өткен жөн. Бұл орталық Қазақстанның құрылыс секторына арналған аккредиттелген қызметтердің толық циклін ұсынады. Мұндай серіктестік құрылыс саласында жұмыс істейтін кәсіпкерлер үшін жаңа мүмкіндіктер ашады, заманауи технологиялар мен сараптамалық білімге қол жеткізуге жол ашады.
Кәсіпкерлер палатасы ғылыми қауымдастықпен одан әрі ынтымақтастыққа дайын екендігін білдірді.
«Біз елорда мен еліміздің инновациялық дамуына бағытталған келешегі зор жобаларды қолдауға дайынбыз», – деді Астана қаласы Кәсіпкерлер палатасының директоры Қанат Әлин.
Астанада өткен кәсіпкерлер мен ғалымдардың жұмыс кездесуі бизнес пен ғылыми орта арасындағы ынтымақтастықтың маңыздылығын көрсетті. Инновациялық технологиялар мен ғылыми әзірлемелерді нақты экономика салаларына енгізу түрлі салалардың дамуына жаңа мүмкіндіктер ашады. Мұндай өзара іс-қимыл Қазақстанның болашақтағы сын-тегеуріндерге дайын, тұрақты және бәсекеге қабілетті экономикасын құру жолындағы маңызды қадам болып табылады.
Пікір қалдыру:
Пікірлер: