«Жоғары жобалық деңгей – реформалар табыстылығының негізі». Қазақстан жобалаушылары мәселелерді жүйелі түрде шешу үшін бірікті
Алматыда «Жоғары жобалық деңгей – реформалар табыстылығының негізі» атты Халықаралық жобалаушылар форумы өтті. Оған мемлекеттік органдардың, Парламенттің, салалық қауымдастықтардың, жобалау ұйымдарының өкілдері мен шетелдік сарапшылар қатысты.
Форум жобалау және құрылыс саласының дамуындағы негізгі мәселелерді талқылауға арналған маңызды алаңға айналды. Жиын аясында қатысушылар жобалау саласындағы анағұрлым өзекті мәселелерді, оларды шешу жолдарын қарастырып, маңызды тұстарға қатысты тәжірибе және пікір алмасты.
Салтанатты түрде форумды ашқан Индустрия және құрылыс вице-министрі Қуандық Қажкенов реформалардың сәтті іске асуы үшін жобалау сапасын арттыру аса маңызды екенін атап өтті.
Парламент Мәжілісінің депутаты Бақытжан Базарбек мәселенің заңнамалық қырына тоқталып, «архитектуралық бейберекеттілікті» еңсеру қажеттігін айтты.
Сондай-ақ Форум аясында ҚР «Атамекен» ҰКП өкілдері, Қазақстанның Республикалық жобалаушылар одағы, Инжинирингтік компаниялар одағының өкілдері баяндама жасап, сарапшылық пікірін білдірді.
Форумға Англия, Португалия, Қырғызстан және Ресейден келген халықаралық сарапшылардың қатысуы қатысушыларға сертификаттау мен біліктілік стандарттары жөніндегі халықаралық тәжірибемен танысуға, іскерлік байланыстар орнатуға және ынтымақтастықты дамытуға мүмкіндік берді.
Форум аясында жобалау саласына өзін-өзі реттеу жүйесін енгізу мәселесіне айрықша назар аударылды. Оның мақсаты – жобалау сапасын арттыру және жобалаушылардың кәсіби жауапкершілігін күшейту.
«Құрылыс саласындағы өзін-өзі реттеу – бұл тек нарық қатысушыларын біріктіру тәсілі ғана емес, жауапкершілік пен бақылауды орнату тетігі. Өзін-өзі реттеу жүйесі арқылы сала қатысушылары құрылыс процесінің ашықтығын, сенімділігін және қауіпсіздігін қамтамасыз ететін ережелерді өздері қалыптастырады. Мұндай тәсіл жобалық-сметалық құжаттаманың сапасын арттыруға, жобаларды сенімді әрі қауіпсіз етуге көмектеседі, ал бұл тапсырыс берушілер, жобалаушылар, мердігерлер және тұтас қоғам үшін түпкі нәтижені жақсартатыны анық», – деді сессия сарапшысы Мюаш Бисарова.
Оның пікірінше, жобалау қызметіндегі мәселелерді шешу жобалау сапасын арттыруға, құрылыс кезіндегі шығындарды азайтуға және жобалау-құрылыс кешенінің барлық субъектілерінің мүддесін қорғауға мүмкіндік береді.
Басқарушы директор – «Атамекен» ҰКП Құрылыс және жер қатынастары департаментінің директоры Данияр Молкенов жобалаушылардың рөлін арттыру мен олардың дамуына жағдай жасаудың маңыздылығын атап өтті.
«Бүгінде бүкіл сала өкілдері талқылап отырған жаңа Құрылыс кодексі Парламент Мәжілісінде қаралып жатыр. Бұл – алдағы жылдарға стратегиялық бағдар беретін құжат. Осы жобаның аясында жобалаушылардың рөлі күшейеді деген үміттеміз. Себебі кез келген құрылыс алдымен жобалаудан басталады. Жобаның сапасына қарай нысанның қауіпсіздігі, оның құны, мерзімі мен пайдалану тиімділігі анықталады», – деді Молкенов.
Оның айтуынша, мемлекет, бизнес және кәсіби қауымдастықтың бірлескен күш-жігерімен Қазақстанда заманауи жүйе құрылуға тиіс. Онда жобалаушының мәртебесі лайықты деңгейде болып, жобалардың сапасы еліміздің құрылыс саласының шынайы бейт-бейнесін көрсететін белгіге айналуы керек.
Пленарлық және сараптамалық сессиялар барысында қатысушылар саланың тұрақты дамуына қажетті мынадай шараларды айқындады:
- заңнаманы және өзін-өзі реттеу тетіктерін жетілдіру;
- жобалаушылар мен инженерлердің кәсіби жауапкершілігін арттыру;
- сертификаттау мен біліктіліктің халықаралық стандарттарын енгізу;
- архитекторлар, инженерлер, сметашылар және мемлекеттік органдар арасындағы өзара іс-қимылды кеңейту.
«Менің ойымша, Парламент Мәжілісі депутаттарының және мемлекеттік органдар өкілдерінің бұл іс-шараға қатысуы жобалаушылардың жұмыс жағдайын және олардың тап болып отырған қиындықтарын тереңірек түсінуге мүмкіндік берді.
Бұл ынтымақтастық алдағы бірлескен шешімдер қабылдауда және құрылыс секторын дамытуға қолайлы жағдай жасауда басты негізге айналады», – деді «Атамекен» ҰКП Төралқасының Құрылыс және ТКШ комитеті төрағасының м.а. Ирина Манжанова.
Форум қорытындысында мемлекеттік органдар мен жобалау ұйымдары үшін жобалаушылардың рөлін күшейтуге және Қазақстандағы сәулет-құрылыс ортасының сапасын арттыруға бағытталған ұсыныстар әзірленді.
Өз кезегінде Парламент Мәжілісі депутаттары көтерілген түйткілді мәселелер мен бастамаларды Парламент Мәжілісінің талқылауына шығаруға дайын екенін айтты.
Пікір қалдыру:
Пікірлер: