Ауыл кәсіпкерлігін дамытудың маңызды мәселелері
Ұлытау облысының Кәсіпкерлер Палатасы директорының орынбасары Жауен Маржан Әбдрашитқызы Ұлытау ауданындағы филиал жұмысына мониторинг жүргізу мақсатында аудандық кеңес мүшелерімен жиналыс өткізді.
Жиналыс барысында кәсіпкерлермен туризмді дамыту, ауыл шаруашылығындағы және білім саласындағы проблемалық сұрақтар талқыланды.
Білім саласында кәсіпкерлер мектепке дейінгі мекемелердегі балаларға жан басына шаққандағы қаржыландыруды көбейту қажеттігін атап өтті. Өз кезегінде Жауен Маржан келесі жылдан бастап ваучерлік тәсілге көшуді ұсынды, себебі бұл жүйеде қаржыландырудың жеткілікті деңгейде қарастырылатынын жеткізді.
Ауыл шаруашылығы саласында егіншілер киіктердің көптігінен егінсіз қалу қаупін айтты. Сонымен қатар, қараусыз жүрген малдардың егістік алқаптарын таптап кетуі де өзекті мәселе екені айтылды. Кәсіпкерлер бұл проблеманы шешу үшін Арқалық қаласының тәжірибесін енгізуді ұсынды. Онда егіске түскен мал иелеріне айыппұл салынады, ал иесіз жүрген малдар ет комбинатына заңды түрде өткізіледі екен.
Туризмді дамыту бағытында кәсіпкерлер Ұлттық парк әкімшілігінің әлі де пысықталмаған бас жоспарына байланысты қиындықтар бар екенін айтты. Атап айтқанда, рекреациялық аймақтардың нақты шекаралары мен категориялары анықталмағандықтан, туризм жобаларын іске асыруға кедергі туындап отыр. Кәсіпкерлер рұқсат етілетін категорияларды нақтылау және түсіндіру жұмыстарында «Атамекен» палатасы арнайы сарапшыларды тартуға көмектессе деген ұсыныс білдірді.
Жиын соңында көтерілген мәселелер бойынша нақты ұсыныстар пысықталып, тараптар бірлесе жұмыс істеуге уағдаласты.
Пікір қалдыру:
Пікірлер: