Алматының 273 кәсіпкерінің құқықтары қорғалды: «Атамекен» палатасы Наурызбай ауданының МКД жұмысындағы бұзушылықтарды анықтады
Алматы қаласының «Атамекен» кәсіпкерлер палатасына Наурызбай ауданының кәсіпкерлері тарапынан ауданның Мемлекеттік кірістер басқармасы банк шоттары бойынша шығыс операцияларын тоқтату туралы өкімдерді жоюдың кешіктірілуіне байланысты шағым түсті.
Алматы қаласы прокуратурасымен бірлесіп Палата талдау жүргізіп, заңнама талаптарының бұзылғанын анықтады. ҚР Салық кодексінің 118-бабы 5-тармағына сәйкес, шығыс операцияларын тоқтату туралы өкім бұғаттау себептері жойылғаннан кейін бір жұмыс күнінен кешіктірілмей жойылуы тиіс.
Алайда Мемлекеттік кірістер басқармасы бұл талапты 273 кәсіпкерге қатысты орындамаған. Соның нәтижесінде олардың жалпы сомасы 415 млн теңгені құрайтын банк шоттары бойынша шығыс операциялары негізсіз тоқтатылып қалған.
Палата Наурызбай ауданы прокуратурасына жүгінді. Мәселені қарау нәтижесінде прокуратура заң бұзушылықтарды жою туралы ұсыну енгізді. Мемлекеттік кірістер басқармасының екі қызметкері жауапкершілікке тартылды, кәсіпкерлердің құқықтары толық қалпына келтірілді.
ЕС-тің мемлекеттік және құқықтану ғылымдарының докторы, Алматы қаласының РПП «Атамекен» кәсіпкерлердің құқықтарын қорғау және әкімшілік кедергілерді азайту жөніндегі сарапшысы Раушан Абубәкірқызының айтуынша, бұл жағдай жедел әрекет ету мен жүйелі құқықтық талдаудың мемлекеттік органдардың заңсыз әрекеттерінің жолын тиімді кесуге мүмкіндік беретінін айқын көрсетеді.
«Мұндай әрбір бұзушылық — жай техникалық қате емес, бұл бизнес үшін нақты тәуекел. Біздің міндетіміз — заңнаманың бұлжытпай орындалуын қамтамасыз ету және кәсіпкерлердің құқықтарын дер кезінде қорғау», — деп атап өтті ол.
Бұл кейс Алматы қаласы РПП «Атамекеннің» мемлекеттік органдар жұмысының ашықтығы мен заңдылығын қамтамасыз ете отырып, бизнес құқықтарын жүйелі түрде қорғауды жалғастырып келе жатқанын тағы бір рет көрсетті.
Пікір қалдыру:
Пікірлер: