Ақмола облысында арнайы салық режимінің мөлшерлемесі 2 пайызға дейін төмендеді
Ақмола облысының барлық дерлік ауданында 2026 жылғы 1 қаңтардан бастап оңайлатылған декларация негізінде арнайы салық режимінің мөлшерлемесі 2%-ға дейін төмендетіледі. Бұл шешім өңірлік кәсіпкерлер палатасы сарапшыларының бизнесті қолдауға және өңірдегі экономикалық өсуді ынталандыруға бағытталған жүйелі және үйлестірілген жұмысының нәтижесі болды.
Еске салсақ, осы жылдың 18 шілдесінде Президент жаңа Салық кодексіне қол қойды. Негізгі өзгерістердің бірі жеңілдетілген салық пен бөлшек салықты бірыңғай режимге - «жеңілдетілген декларациядағы арнайы салық режиміне» біріктіру болды. Мұндай шара салықтық әкімшілендіруді жеңілдетуге, шағын және орта бизнеске түсетін бюрократиялық жүктемені азайтуға және кәсіпкерлік қызметті жүргізу үшін қолайлы жағдай жасауға мүмкіндік береді.
Өңірлік кәсіпкерлер палатасы облыстың қалалары мен аудандарының әкімдіктері мен мәслихаттарына 2026 жылғы 1 қаңтардан бастап АСР мөлшерлемесін 2%-ға дейін төмендету туралы шешім қабылдау туралы өтінішхаттарды жолдады. Нәтижесінде 20 өңірдің 18-інде (Ақкөл, Аршалы, Астрахан, Атбасар, Бурабай, Біржан сал, Бұланды, Егіндікөл, Ерейментау, Есіл, Жарқайың, Зеренді, Қорғалжын, Сандықтау, Целиноград, Шортанды аудандары мен Қосшы және Степногорск қалалары) мәслихат сессиялары өтті. Онда АСР мөлшерлемесін 2%-ға дейін төмендету туралы шешім қабылданды.
Көкшетау қаласында жеңілдетілген режим бойынша мөлшерлеме 3% деңгейінде бекітілді. Бұл қалалық экономиканың ерекшелігін және жергілікті бюджеттің құрылымын көрсетеді. Өкінішке қарай, Жақсы ауданында мөлшерлеменің төмендеуі қолдау таппады. Әкімдік мәслихатпен біржақты тәртіппен базалық мөлшерлемені 2026 жылы 4% деңгейінде сақтау туралы шешім қабылдады.
«Бизнес-қоғамдастық атынан мәслихат депутаттарына, аудандар мен қалалардың әкімдеріне, сондай-ақ осы шешімді қолдаған облыс басшылығына алғысымызды білдіреміз. АСР мөлшерлемесін төмендету кәсіпкерлер үшін салық жүктемесін тікелей жеңілдету ғана емес, сонымен қатар өңірдегі экономикалық өсуді ынталандырудың стратегиялық құралы. 2% мөлшерлемемен бизнес өндірісті дамытуға, ассортиментті кеңейтуге және қызмет көрсету сапасын арттыруға көбірек қаражат жұмсауға мүмкіндік алады. Бұл әсіресе жоғары инфляция және операциялық шығындардың өсуі жағдайында өте маңызды», - деп атап өтті Ақмола облысы кәсіпкерлер палатасы директорының орынбасары Расул Сыздықов.
Оның айтуынша, салық жүктемесін төмендету жергілікті өндірушілердің бәсекеге қабілеттілігін арттыруға және басым салаларға инвестиция тартуға ықпал етеді.
«Өңірлік бюджеттер, керісінше, іскерлік белсенділіктің өсуінен пайда көреді: компаниялардың айналымының артуы салық базасының кеңеюіне, жұмыс орындарының өсуіне және тұтынушылық сұраныстың артуына әкеледі. Бұл тәсіл бір мезгілде бюджет кірістерін қолдауға және шағын және орта бизнесті дамытуға мүмкіндік береді», - деп қосты ол.
Айта кетейік, Үкімет оңайлатылған декларация негізінде арнаулы салық режимі қолданылмайтын қызмет түрлерінің тізбесін бекітті. Тізбеге 44 санат, оның ішінде 185 ЭҚЖЖ коды кіреді.
Пікір қалдыру:
Пікірлер: