Қарағанды облысында отандық мектеп формасын енгізу бойынша пилоттық жоба іске қосылады
Қарағанды облысында отандық өндірістегі мектеп формасын енгізу бойынша пилоттық жоба бастау алады. Жоба Қарағанды облысының Кәсіпкерлер палатасы, Білім басқармасы және өңірлік өндірушілердің қатысуымен жүзеге асырылып, жергілікті жеңіл өнеркәсіпті қолдауға, ата-аналардың шығындарын азайтуға және мектеп формасының сапасын қамтамасыз етуге бағытталған.
Алғашында жобаға Қарағанды қаласының төрт мектебі енгізілген болатын. Алайда талқылау қорытындысы бойынша пилоттық жоба облыстың жеті өңіріндегі 22 мектепке дейін кеңейтілді. Бұл жергілікті өндірушілерді тартуға және сапалы өнімге тек облыс орталығындағы ғана емес, аудан мектептерінің оқушыларына да қолжетімділікті қамтамасыз етуге мүмкіндік береді.
Кездесуде баяндамашы ретінде Қарағанды облысының Кәсіпкерлер палатасы жанындағы Жеңіл өнеркәсіп кеңесінің төрағасы Андрей Шмарин сөз сөйледі. Ол жобаны табысты іске асырудың басты факторы — жұмысты уақытылы бастау екенін атап өтті.
«Біз процесті дәл қазір бастауымыз қажет. Сонда тамыз айының ортасына қарай балалар мектеп формасын алып, жаңа оқу жылына алаңсыз дайындала алады», — деді Андрей Шмарин.
Оның айтуынша, жоба отандық өндірісті дамытуға және қазақстандық өнімге деген сенімді арттыруға бағытталған.
«Біздің міндетіміз — өңірде мектептерді сапалы әрі қолжетімді бағамен қамтамасыз ете алатын нақты өндіріс бар екенін көрсету», — деп атап өтті ол.
Қарағанды облысы Кәсіпкерлер палатасы директорының орынбасары Ерлан Қалиев Палатаның үйлестіруші рөлін және барлық тараптардың өзара іс-қимылының маңыздылығын атап өтті.
«Бұл жоба бизнес, білім беру саласы және мемлекеттік құрылымдарды біріктіреді. Біздің міндет — өндірушілер, мектептер мен ата-аналар арасындағы тиімді өзара әрекет моделін қалыптастыру», — деді Ерлан Қалиев.
Өз кезегінде өндірушілер бағаның тұрақтылығы мен өнім сапасының жоғары болатынын растады.
«Баға жиынтыққа және тапсырыс көлеміне байланысты болады, бірақ нарық деңгейінде қалады. Үлкен көлемде шикізат құны төмендейді, бұл ата-аналарға қолжетімді бағамен сапалы өнім ұсынуға мүмкіндік береді», — деді сала өкілдері.
Әлеуметтік қолдау мәселесіне ерекше назар аударылды.
«Біз жыл сайын аз қамтылған отбасылардың балаларына тегін мектеп формасын береміз — орта есеппен әр сыныптан бір-екі оқушы. Бұл — біздің әлеуметтік жауапкершілігіміз», — деп атап өтті өндірушілер.
Пилоттық жоба аясында мектеп формасының үлгілерін таныстыру жоспарланған — Қарағандыда орталықтандырылған түрде және өңірлерге шығу арқылы. Өндірушілер ата-аналар комитеттерімен тікелей жұмыс істейді, бұл мектептерге түсетін жүктемені азайтады.
Кездесу қатысушылары пилоттық жоба өңірдің жеңіл өнеркәсібін дамытудағы маңызды қадам болатынына, отандық өнім сапасын көрсетуге мүмкіндік беретініне және болашақта Қазақстанның басқа өңірлеріне таратуға негіз болатынына сенім білдірді.