Павлодарлық туристік фирмаларға «Атамекен» палатасындағы кездесуде «Ертіс орманы» орман резерватында бизнес жүргізу ұсынылды
Павлодар облысының Кәсіпкерлер палатасында туризм және қонақжайлылық салалық кеңесінің отырысы өтті. Оны «Атамекен» ӨКП директоры Ерқанат Әбенов жүргізді.
Палата директоры ӨКП-ға «Ертіс орманы» мемлекеттік орман табиғи резерваты тарапынан осы қарағайлы орманда экологиялық туризмді дамыту жобасының таныстырылымын ұйымдастыру туралы ұсыныс хат түскенін атап өтті. Резерваттың негізгі міндеттері – осы бірегей табиғи кешенді қорғау және қалпына келтіру болып табылады және солай болып қала береді, деді резерваттың туризм және экологиялық ағарту бөлімінің басшысы Гүлнар Нұрымова. Экологиялық туризм – резерват жанындағы қосымша әрі қатаң реттелетін қызмет.
Шалдай ауылынан он екі шақырым жерде қонақ үй бар – 1939 жылы салынған бұрынғы мектептің ағаш ғимараты, ол 2017 жылы резерватқа берілген. Онда монша, мангал аймағы, бақша, жазғы және балалар алаңдары, беседкалар бар. Бұл нысан өте танымал – «туристерден босамаймыз, бірақ ғимараттың сыйымдылығы небәрі 20 адам», – деп қосты спикер.
«Біз жер учаскелерін 5 жылдан 49 жылға дейінгі мерзімге ұзақ және қысқа мерзімді пайдалануға беруді жоспарлап отырмыз. Сонымен қатар, біздің аумақта он екі туристік маршрут пен соқпақ әзірленіп, бекітілген, оның ішінде төртеуі – зиярат ету бағыттары (ең танымалы – Ғабдул Уахит хазірет кесенесіне). Сегіз спорттық-сауықтыру маршрутының ішінде ең танымалы – “Өз өлкеңді таны”, онда біз оқушыларды экскурсияға апарамыз, сондай-ақ Лешкин соқпағы», – деді спикер.
Туристік фирмаларға жалға беруге бөлінген жер телімдері көп жағдайда осы маршруттармен қиылысады, деп толықтырды Гүлнар Нұрымова. Ол Павлодар облысының Кәсіпкерлер палатасынан осы табиғи резерватта туристік өнім жасағысы келетін инвесторларды табуға көмек сұрады. Қазірдің өзінде турбизнеске 300 миллион теңге инвестиция салуға ниетті үш әлеуетті инвестор бар. Олар Шалдай ауылынан екі шақырым жерде, 1960 жылғы ескі питомник аумағында 27 гектар жерге демалыс базасын салуды жоспарлап отыр. Ол жерге электр желілері тартылған, су алуға арналған ұңғымалар бар.
«Біз бұл құрылыстар мен нысандарды көргіміз келеді, бірақ олар экологиялық, санитарлық нормаларға сай болуы тиіс және туристерімізге жайлы, қауіпсіз демалыс жағдайын жасауы қажет», – деп нақтылады резерваттың туризм және экологиялық ағарту бөлімінің басшысы.
Бұл аумаққа кіру үшін бизнес субъектілері конкурсқа қатысып, алдын ала тиісті бизнес-жоспар дайындап, резерват дирекциясына жүгінуі керек. «Атамекен» ӨКП директоры Ерқанат Әбенов қажетті инфрақұрылым жасалмайынша, резерватқа бизнесті тарту қиын болатынын айтты. Қажетті инвестициялар көлемі аз болмайды.
«Егер инфрақұрылым болмаса, орман резерватында туристер ағыны да болмайды. Оның үстіне, онда Баянауыл табиғи паркіндегідей үлкен су айдындары немесе олардың көп саны жоқ. “Ертіс орманы” МОРТР-да ауызсу мәселесі де бар», – деді Ерқанат Әбенов резерват өкіліне.
Оның пікірінше, қазір алдымен өз жобаларымен кіруге шешім қабылдаған кәсіпкерлерге қолдау көрсеткен жөн: кіреберіс жолдар мәселесін тезірек шешу қажет. Палата директоры бұған дейін ӨКП облыстың туристік саласын дамыту мастер-жоспарын әзірлеуге қатысқанын да еске салды. Қарағайлы орманда экотуризмді дамыту үшін инвесторлар тарту мәселесін осы мастер-жоспарға енгізу керек.
Облыстық дене шынықтыру және спорт басқармасының туризм бөлімінің басшысы Руслан Нұрбеков резерватта жыл бойғы туризмді дамыту үшін жылыту мәселесін де шешу қажет екенін, атап айтқанда, ғимараттарды газбен жылытуға рұқсат беру керектігін айтты. Ерқанат Әбенов жуық арада тағы бір кездесу өткізуді ұсынды, оған резерват орналасқан Щербақты және Аққулы аудандарының әкімдіктері, сондай-ақ МОРТР дирекциясы мен профильдік облыстық басқарма өкілдері қатысуы тиіс.
«Біз «Атамекен» палатасы ретінде инвесторларды тартуға дайынбыз. Оның аумағында экотуризммен қатар зиярат ету туризмін және демалыс күнгі туризмді де дамытуға болады. Бірақ инфрақұрылымдық мәселелер шешілсе ғана бұл бизнес үшін тартымды болады», – деп түйіндеді ол.