Бизнес пен Сенат ашық диалогта: Алматыда Жаңа Конституция жобасы талқыланды.

27 ақпанда Алматы қаласында, «AMANAT» партиясының қалалық филиалы алаңында «Әділетті және Прогрессивті Қазақстанның Халықтық Конституциясы үшін!» бастамасын түсіндіру жөніндегі Жалпыұлттық коалиция қызметі аясында кездесу өтті.

Талқылауға Парламент Сенатының депутаттары Жанна Асанова, Марат Қожаев және Нурия Ниязова қатысты.

Алматы қаласының «Атамекен» Өңірлік кәсіпкерлер палатасы өз кезегінде бизнес өкілдерін шақырды. Диалогқа қаланың 60-қа жуық белсенді кәсіпкері тартылды.

Формат ашық, еркін диалог және «сұрақ–жауап» сессиясы түрінде өтті. Бұл қағидатты тұрғыдан маңызды. Конституция туралы сөз болғанда, бұл тек құқықтық мәтін немесе саяси күн тәртібі ғана емес. Бұл азаматтар, бизнес және мемлекет өмір сүретін негізгі қағидалар жиынтығы.

Кәсіпкерлер қауымдастығы атынан Алматы қаласы «Атамекен» ӨКП директоры Чингисхан Маманов сөз сөйледі.

Ол атап өтті:

«Бизнес “Конституция” деген сөзді естігенде, оның абстрактілі саясат емес екенін жақсы түсінеді. Бұл күн сайын жұмыс істейтін ережелердің негізі. Бизнес есеппен өмір сүреді және адамдар, міндеттемелер мен инвестициялар алдындағы жауапкершілікті арқалайды. Кез келген кәсіпкер үшін ең басты сұрақ қарапайым: мен алдағы 3–5 жылға сенімді түрде жоспар құра аламын ба?»

Өз сөзінде ол кәсіпкерлік қауымдастық үшін ережелердің тұрақтылығы, жеке меншікті қорғау, заңды қызметті еркін жүргізу және сотта өз құқықтарын қорғау мүмкіндігі қағидатты маңызға ие екенін атап өтті.

«Қарапайым тілмен айтсақ, Конституция бизнеске үш нәрсе береді: қорғау, тұрақтылық және болашақты жоспарлау мүмкіндігі. Ал жоспарсыз бизнес бұл бизнес емес, бұл тек күнкөріс».

Талқылау барысында кәсіпкерлер сенаторларға Жаңа Конституция жобасына қатысты көптеген өзекті әрі тәжірибелік сұрақтар қойды. Диалог мазмұнды және конструктивті өтті. Қатысушылар жауаптарды тікелей бірінші тұлғалардан алды, бұл құжат ережелерін және олардың іскерлік ортаға ықпалын дұрыс түсіну үшін аса маңызды.

Мұндай кездесулер тек бизнес үшін ғана маңызды емес. Бұл ашық диалогқа, пікір алмасуға және ортақ ұстаным қалыптастыруға мүмкіндік беретін кемел азаматтық қоғамды қалыптастыру тетігі. Мемлекет бизнесті естіп, ал бизнес қоғамдық үдерістерге белсенді қатысқанда, өзара сенім нығаяды және ел экономикасының орнықты дамуына негіз қаланады.

Ашық диалог бұл жай формалдылық емес, бұл мемлекетіміздің болашағы үшін ортақ жауапкершіліктің нақты құралы.