Жаңа салық салу жүйесіне көшудің өтпелі кезеңі аяқталды: 265 мың адам «көлеңкеден» шықты

1,2 млн-нан астам кәсіпкер оңайлатылған декларация негізіндегі АСР-ды таңдады

Қазақстанда ауқымды салық реформасы аясында басталған салық салу режимдерін таңдау бойынша өтпелі кезең ресми түрде аяқталды. Биыл 1 наурыздағы жағдай бойынша салық төлеушілердің жаңартылған құрылымы толық қалыптасты. Бұл бизнес өкілдерінің жұмыстың оңайлатылған әрі ашық форматтарына жаппай көшкенін көрсетті. Бұл туралы бүгін ҚР ҚМ Мемлекеттік кірістер комитеті хабарлады.

Шағын және орта бизнес өкілдері арасында ең сұранысқа ие тетік –оңайлатылған декларация негізіндегі арнаулы салық режимі (АСР) болып қалды. Оны 1,2 млн-нан астам кәсіпкер таңдаған.

Режимнің танымалдығы оның түбегейлі жаңғыртылуымен байланысты. Қолданыстағы талаптарға сәйкес, жылдық табысы 600 мың АЕК-ке дейін (шамамен 2,6 млрд теңге) болатын компаниялар «оңайлатылған» режимді пайдалана алады. Негізгі жаңашылдықтардың бірі – жалдамалы қызметкерлер санына қойылған шектеудің алып тасталуы. «Атамекен» ҰКП сарапшыларының пікірінше, бұл еңбек нарығын заңдастыруға айтарлықтай серпін берді.

Ведомство мәліметінше, режимнің негізгі артықшылықтары мыналар:

- КТС/ЖТС бойынша бірыңғай мөлшерлеме – 4% (мәслихаттардың оны 50%-ға дейін түзету құқығы бар);

- ҚҚС пен әлеуметтік салықтан толық босату;

- Есептілік пен төлемдерді жылына екі рет тапсыру.

Мемлекеттік кірістер комитетінің есебінде өзін-өзі жұмыспен қамтыған азаматтарға арналған АСР-ға ерекше назар аударылған. Қазір бұл режимді 346 мың жеке тұлға қолданады. Олардың 265 мыңы бұған дейін бейресми қызмет атқарған. Осылайша, реформа ширек миллионнан астам азаматтың еңбегін заңдастыруға мүмкіндік берді.

Бұл формат айына 300 АЕК-ке дейін (шамамен 1,3 млн теңге) табыс табатын, жалдамалы қызметкерлерсіз жұмыс істейтін тұлғаларға арналған. Олардың қатарына платформалық жұмыспен қамту өкілдері – курьерлер, такси жүргізушілері және фрилансерлер кіреді.

Азаматтар үшін артықшылықтар қатарында:

- Жеке кәсіпкер ретінде тіркелудің қажеті жоқ;

- Жеке табыс салығынан босату;

- Табыс көлемінің 4%-ы мөлшеріндегі бірыңғай әлеуметтік төлем (оған зейнетақы жарналары, әлеуметтік және медициналық сақтандыру кіреді).

Өзін-өзі жұмыспен қамтығандарға арналған режим азаматтарға ресми жұмыс істеуге, зейнетақы жинақтарын қалыптастыруға және әлеуметтік қорғауға қол жеткізуге мүмкіндік береді.

Өтпелі кезеңнің аяқталуы мемлекетке салық төлеушілердің өзекті базасын қалыптастыруға жол ашты. Ведомствоның атап өтуінше, жасалған жағдайлар елде бизнес жүргізуді анағұрлым болжамды етті. Реформаның басты жетістігі ретінде азаматтар үшін әкімшілендірудің қарапайымдылығы мен мемлекет тарапынан әлеуметтік қорғау кепілдіктері арасындағы теңгерім аталады.