Ынтымақтастықты кеңейту: «Атамекен» ҰКП мен ҚР СІМ инвестициялық жобаларды сүйемелдеуді күшейтуде
Инвестициялық саясаттың тиімділігі мемлекет пен жеке сектор арасындағы диалогтың сапасына тікелей байланысты
«Атамекен» Ұлттық кәсіпкерлер палатасы алаңында ҚР Сыртқы істер министрлігі Инвестициялар комитетінің төрағасы Ғабидолла Оспанқұловпен кездесу өтті. Кездесудің негізгі тақырыбы – инвестициялық жобаларды сүйемелдеу тетіктерін дамыту және мемлекет пен бизнес-қоғамдастық арасындағы өзара іс-қимылды күшейту болды.
Кездесу барысында тараптар «Атамекен» ҰКП-ның Инвестициялық жобалардың ұлттық платформасының жұмысына қатысуын талқылады. Аталған платформа келешек инвестициялық бастамалар туралы ақпаратты шоғырландыруға және олардың іске асырылуының ашықтығын қамтамасыз етуге бағытталған.
Сондай-ақ, Палатаның отандық бизнестің инвестициялық жобаларын сүйемелдеудегі рөліне ерекше назар аударылды. Оның ішінде кәсіпкерлерге жобаларды іске асырудың инвестициялық идеяны қалыптастырудан бастап өндірісті іске қосуға дейін әртүрлі кезеңдерінде әкімшілік кедергілерді еңсеруге жәрдем көрсету мәселелері қарастырылды.
Талқылау аясында «Атамекен» ҰКП инвесторлармен өзара іс-қимыл жүйесінде орталық деңгейдегі фронт-офис субъектісі ретінде қарастырылатыны атап өтілді. Бұл бизнес пен мемлекеттік органдар арасындағы тікелей қарым-қатынасты қамтамасыз етеді.
Кездесуге қатысушылар инвестициялық саясаттың тиімділігі көбіне мемлекет пен жеке сектор арасындағы диалогтың сапасына байланысты екенін атап өтті. Осыған байланысты өзара іс-қимыл тетіктерін одан әрі жетілдіру және инвесторлар тарапынан туындайтын мәселелерді жедел шешу қажеттігі айтылды.
Сонымен қатар кәсіпкерлердің құқығын қорғау және болжамды реттеуші ортаны қалыптастыру мәселелеріне ерекше көңіл бөлінді. Бұл – елдің инвестициялық тартымдылығын арттырудың маңызды факторы.
Кездесу қорытындысы бойынша тараптар бірлескен жұмысты жалғастыруға уағдаласты. Жақын арада «Атамекен» ҰКП сарапшыларының Инвестициялық жобалардың ұлттық платформасын толықтыруға қатысу тетіктерін пысықтау және орталық әрі өңірлік деңгейдегі фронт-офистердің жұмысын үйлестіруді күшейту жоспарлануда.