Бизнес үшін: референдум қарсаңында Павлодардағы «Атамекен» палатасында экономикалық соттағы татуласу тәжірибесі айтылды
Павлодар облысының мамандандырылған ауданаралық экономикалық сотының өкілдері және оның төрағасы Айтқали Жақыпбековпен кездесу өңірлік Кәсіпкерлер палатасының алаңында өтті. Отырысты модерациялаған – «Атамекен» ӨКП директоры Ерқанат Әбенов.
МАЭС төрағасы Айтқали Жақыпбеков экономикалық даулардағы татуласу рәсімдерінің оң тәжірибесін, табысты практикаларды және өңір бизнесі үшін оның артықшылықтарын атап өтті. Оның айтуынша, 2025 жылдың он екі айында Павлодар облысының экономикалық сотына 4212 талап арыз және 213 іс түскен. Бұл – өткен жылмен салыстырғанда он екі пайызға аз. Ол кезде 4787 талап арыз және 276 іс болған.
«Талап арыздар саны азайғанымен, олардың кері қайтарылу саны артты. 2025 жылы мұндай жағдайлар 642 болды, бұл 2024 жылмен (491) салыстырғанда 23,5 пайызға көп. 2025 жылы сот шешімі шығарылып, 1896 іс аяқталды», – деп атап өтті спикер.
Айтқали Жақыпбеков Павлодар облысының Кәсіпкерлер палатасының директорына осы соттың бизнес өкілдерімен кездесулерін өткізу үшін «Атамекен» ӨКП алаңын тұрақты түрде ұсынғаны үшін алғыс білдірді. Кездесу барысында кәсіпкерлер өз сұрақтарын қойып, сот төрағасынан сот даулары мен оларды бейбіт жолмен шешу мүмкіндіктері жөнінде ұсыныстар алды.
«Біз мұндай кездесулерді өз алаңымызда тұрақты түрде өткізіп келеміз. Бұл – бизнес субъектілерінің құқықтық сауаттылығын арттыру және жалпы кәсіпкерлердің мүдделерін қорғау мақсатында жасалып отыр», – деді Ерқанат Әбенов.
Қазақстанның жаңа Конституциясында бизнесті сот арқылы қорғау конституциялық құқық ретінде кепілдендірілген. Әркімнің сот арқылы қорғалуға құқығы бар, ал соттар тек Конституцияға сәйкес келетін және құқықтар мен бостандықтарды шектемейтін нормаларды қолдануға міндетті. Конституциялық құқықтар бұзылған жағдайда кәсіпкер нормативтік актілер мен мемлекеттік органдардың әрекеттеріне шағымдана алады. Мемлекетпен, квазимемлекеттік сектормен немесе ірі ойыншылармен туындайтын даулар бейресми келісімдер немесе әкімшілік қысым арқылы емес, құқықтық алаңда шешілуі тиіс.
Жаңа Конституцияны қабылдау жөніндегі референдум 15 наурызда өтеді.
