Жітіқара ауданында кәсіпкердің құқығы қорғалды

Жітіқара ауданында жергілікті кәсіпкер Алексей Власюк тап болған қиын жағдай оң шешімін тапты. Кәсіпкерлер палатасының Жітіқара ауданындағы филиалының араласуымен бизнесмен мемлекеттік сектормен жұмыс істеу құқығын сақтап қалды.

Алексей Власюк сұранысқа ие іспен — пластикалық терезелерді орнату және оларға қызмет көрсетумен айналысады. Мемлекеттік органмен жасалған кезекті келісімшарт үйреншікті жұмыс кезеңі болуы тиіс еді, алайда адами фактор мен электрондық рәсімдердің қыр-сырын білмеу салдары кедергі келтірді.

Тендер аяқталғаннан кейін кәсіпкер қорытындылардың электрондық хаттамасына уақтылы қол қойғанымен, келісімшарттың өзіне қатаң белгіленген мерзімде қол қою қажеттігін ескермей қалған. Жүйе автоматты түрде жұмыс істеп, негізгі құжатта қолтаңбаның болмауы жеке кәсіпкердің өнім берушілердің «қара тізіміне» енуіне әкеп соқты.

Тізілімге ескертусіз қосып жіберді. Шағын бизнес үшін бұл нарықтың маңызды сегментінде жұмыс істеуге іс жүзінде тыйым салу деген сөз, — дейді кәсіпкер

Бұл тек техникалық қателік екенін түсінген Алексей өз мүддесін қорғау үшін Кәсіпкерлер палатасының филиалына жүгінді. Мәселе үшжақты комиссияның қарауына шығарылды. Палата сарапшылары жағдайды талдап, кәсіпкердің адалдығы мен міндеттемелерін орындауға дайын екендігін алға тартып, оның пайдасына дәлелдер келтірді. Комиссияның үйлесімді бірлескен жұмысының нәтижесінде Алексей Власюкті жоспарсыз өнім берушілер тізілімінен шығару туралы шешім қабылданды. Тиісті хаттама уәкілетті органға жолданды.

Алексей Власюк Палата филиалының қызметкерлеріне жедел әрекеттері мен қолдау көрсеткені үшін шынайы алғысын білдірді.

Қостанай облысы Кәсіпкерлер палатасының директоры Ренат Дәулетпаевтың айтуынша, бұл оқиға Кәсіпкерлер палатасының бизнес пен мемлекеттік құрылымдар арасындағы тиімді буын екенін және заң аясында кез келген мәселені сындарлы түрде шешуге болатынын тағы бір мәрте дәлелдейді.