Ембі қаласының кәсіпкерлері тарифтер, жер және мемлекеттік қолдау мәселелерін Өңірлік кеңестің көшпелі отырысында көтерді

Мұғалжар ауданының Ембі қаласында Ақтөбе облысы Кәсіпкерлер палатасы Өңірлік кеңесінің төрағасы Асхат Айтжановтың жетекшілігімен көшпелі отырыс өтті. Іс-шараға Мұғалжар ауданы әкімінің орынбасары Талғат Өтемұратов, Ембі қаласының әкімі Наурызбек Сарбасов, аудан прокурорының орынбасары Нұрлан Сандыбай, облыстық палата директорының орынбасары Руслан Куйшінов, сондай-ақ Өңірлік кеңес мүшелері мен бизнес өкілдері қатысты.

Сапар бағдарламасы аясында Өңірлік кеңес мүшелері Ембі қаласында жұмыс істейтін теміржол саласындағы кәсіпорындардың бірі — жаңартылған «ОЛЖА» ЖШС қызметімен танысты.

Ембі қаласындағы «ОЛЖА» АҚ филиалын аралау барысында 120 жылдан астам тарихы бар локомотив депосының бүгінде толық жаңғыртылып, заманауи сервистік орталық ретінде жұмыс істеп отырғаны атап өтілді (жаңарту 2019 жылы жүргізілген). Қайта жаңғыртудан кейін нысан толыққанды жұмысын қалпына келтірген: ғимараттар мен инфрақұрылым күрделі жөндеуден өткен, заманауи жабдықтар енгізілген, кәсіпорын тәулік бойы жұмыс істейді. Өндірісте шамамен 80 қызметкер еңбек етеді.

1995 жылы құрылған «ОЛЖА» ЖШС локомотивтерді жалға беру (экипажымен қоса), техникалық қызмет көрсету және жөндеу, сондай-ақ реостаттық сынақтар жүргізу сияқты кешенді қызметтер көрсетеді. Компанияның өз зертханасы бар және ТЭМ-18ДМ, ТЭМ-2, СКД6С және СКД9С үлгілеріндегі локомотивтерді ұсынып, икемді ынтымақтастық шарттары мен тәулік бойы клиенттерге қолдау көрсетеді.

Кәсіпорынды аралау барысында Ембі қаласындағы филиал директоры Дәулетқали Жалмұхамбетов өндірісті кеңейту үшін қосымша жер учаскесін бөлу қажеттілігі мәселесін көтерді. Кездесуге қатысқан аудан әкімінің орынбасары Талғат Өтемуратовқа Өңірлік кеңес төрағасы Асхат Айтжанов бұл мәселені қарастырып, аудан әкімдігі деңгейінде қолдау көрсетуді сұрады.

Сондай-ақ кәсіпорын қызметкерлерді тегін тамақтандыру және тұрғын үймен қамтамасыз ету арқылы тұрақты әлеуметтік еңбек жағдайларын жасап отырғаны атап өтілді.

Отырыс барысында Ембі қаласының кәсіпкерлері тариф қалыптастыру, жер қатынастары, мемлекеттік гранттарға қолжетімділік және несиелендіру мәселелерін көтерді. Барлығы бизнес жүргізу шарттарына қатысты 13 мәселе мен ұсыныс айтылды.

Асхат Айтжанов мұндай көшпелі кездесулердің маңыздылығын атап өтті:
«Мұндай аудандарға шығу – жергілікті жерлердегі бизнестің жағдайын бақылауға, мәселелерді әкімдіктермен бірлесіп жедел шешуге, сондай-ақ мемлекеттік қолдау шараларын түсіндіруге және кәсіпкерлік бастамаларды сүйемелдеуге мүмкіндік береді».

Облыстық кәсіпкерлер палатасы директорының орынбасары Руслан Куйшінов бизнесті қорғау мәселелеріне тоқталды:
«2025 жылы Палатаға 287 өтініш түсті, 2026 жылдың бірінші тоқсанында – 78. Барлығы 338 өтініш толық немесе ішінара шешімін тапты. 2025 жылы біз 15 сот ісіне қатысып, бизнес субъектілерінің 861,5 млн теңге көлеміндегі мүліктік мүдделерін қорғадық».

Аудан әкімінің орынбасары Талғат Өтемуратов кәсіпкерлікті дамыту бойынша өзекті деректерді ұсынды:
«2026 жылғы 1 наурыздағы жағдай бойынша ауданда 4 223 ШОБ субъектісі тіркелген, оның ішінде жұмыс істеп тұрғаны – 4 083. Шағын және орта бизнесте 6 946 адам жұмыспен қамтылған, өндірілген өнім көлемі 73,5 млрд теңгені құрады. 2025 жылы 43 адамға 400 АЕК мөлшерінде қайтарымсыз грант берілді».

Өңірлік кеңес мүшесі Арман Жылгелді Палата жанындағы салалық кеңестердің қызметі туралы айтты:
«Қазіргі таңда Палата жанында 200-ден астам кәсіпкерді біріктіретін 8 салалық кеңес жұмыс істейді. Бұл – мемлекеттік органдармен диалог жүргізудің тиімді алаңы, бизнеске қатысты өзекті мәселелер бойынша жедел шешімдер қабылдауға мүмкіндік береді».

Ол сондай-ақ кәсіпкерлерді өзекті ақпарат алу және салалық мәселелерді шешу үшін кеңестер жұмысына белсенді қатысуға шақырды.

Ембі қаласының әкімі Наурызбек Сарбасов жергілікті атқарушы биліктің ашықтығын атап өтті:
«Біз кәсіпкерлермен ашық диалогқа және олардың бастамаларын жан-жақты қолдауға дайынбыз».

Айта кетейік, бұған дейін Наурызбек Сарбасов кәсіпкерлікпен айналысқан, 2020 жылдан бастап Өңірлік кеңестің белсенді мүшесі болып, сонымен қатар облыстық мәслихат депутаты ретінде ауыл кәсіпкерлігін дамытуға елеулі үлес қосқан.

Кездесу аясында Өңірлік кеңес мүшелері мен Палата дирекциясы Наурызбек Сарбасовты Ембі қаласының әкімі қызметіне сайлануымен құттықтап, алғыс хат табыстады.

Отырыстан кейін кәсіпкерлерді жеке қабылдау өтті. Үш адам мал сою цехын ашу және макулатурадан кірпіш өндіру мәселелері бойынша кеңес алды. Барлық өтініштер бақылауға алынып, түсіндірмелер берілді, әрі қарай әкімдік пен Палата тарапынан сүйемелдеу жалғасады.

Аудандық Палата филиалының директоры Көмекбай Бектұрғанов «Бір ауыл – бір өнім» жобасының жүзеге асырылуы туралы ақпарат берді, сондай-ақ әйел кәсіпкерлерге арналған жеке семинар өткізілді.

Кездесу қорытындысы бойынша Асхат Айтжанов:
«Жергілікті жерлерде бизнеспен ашық диалог жүргізу жүйелі мәселелерді уақытылы анықтауға ғана емес, нақты шешімдер табуға да мүмкіндік береді. Біздің міндет – кәсіпкерлердің өз ісін сенімді дамытуына және өңір экономикасына үлес қосуына жағдай жасау», – деді.

Мәдени бағдарлама аясында қатысушылар Жұбановтар ағайындыларының мемориалдық музейіне де барды. Музейде 3 мыңнан астам экспонат сақталған, оның ішінде Ахмет Жұбановтың жеке заттары, концерттік фрагы мен дирижерлік таяқшасы бар. Бұл экспозициялар қазақ классикалық музыкасының дамуына зор үлес қосқан атақты әулеттің тарихын көрсетеді. Қатысушылар музей экспозициясымен танысып, Жұбановтар мұрасының маңыздылығын атап өтті. Сонымен қатар, қонақтар пікірлер кітабына жазба қалдырып, музейге туристік маршрутты дамыту бойынша бірқатар ұсыныстар енгізуге ниет білдірді.