Атырау мен Башқұртстан санаторлық-курорттық туризм саласындағы ынтымақтастықты нығайтуда

Атырау облысының Кәсіпкерлер палатасында өңір бизнес өкілдерінің «Красноусольск» шипажайы делегациясымен іскерлік кездесуі өтті. Іс-шара туризм, мәдениет және денсаулық сақтау салаларындағы ынтымақтастықты дамыту аясында ұйымдастырылды.

Башқұрт делегациясын шипажайдың бас директоры Рамиль Бадретдинов басқарды. Сапар барысында тараптар халықаралық әріптестік перспективаларын және Қазақстаннан Башқұртстанға туристік ағынды арттыру мүмкіндіктерін талқылады.

Сапардың негізгі мақсаты — қазақстандық туроператорлармен, кәсіпорындармен және кәсіподақ ұйымдарымен тікелей байланыс орнату. Шипажай өкілдері тікелей келісімшарттар жасауға және қазақстандық туристер есебінен клиенттік базаны кеңейтуге мүдделі екендерін атап өтті.

«Башқұртстан Республикасынан келдік, клиенттік базаны кеңейтіп, Қазақстанмен ынтымақтастық орнатқымыз келеді. Кәсіпорындар, ұйымдармен тікелей келісімшарттар жасау үшін шипажайымызды таныстырып жатырмыз. Бұл — біздің Атырауға алғашқы сапарымыз. Қазірдің өзінде бізге Қазақстаннан, әсіресе Атырау облысынан келетін қонақтар көп. Сондықтан өңірмен ынтымақтастықты белсенді түрде дамытуды жоспарлап отырмыз», — деді шипажайдың сату және орналастыру бөлімінің басшысы Оксана Маркисова.

Кездесу барысында қатысушылар өңірлер арасындағы көлік логистикасын және тікелей қатынасты дамыту, баға саясатын жетілдіру, сондай-ақ валюта айырбастау мәселелерін басты бағыттар ретінде белгіледі. Тараптардың пікірінше, бұл міндеттерді шешу санаторлық-курорттық қызметтердің қолжетімділігін арттырып, бағыттың тартымдылығын күшейтеді.

Атырау облысының Кәсіпкерлер палатасының директоры мұндай кездесулердің маңыздылығын атап өтті.

«Башқұртстан Республикасымен әріптестік қатынастарды дамыту өңіріміздің бизнесі мен тұрғындары үшін жаңа мүмкіндіктер ашады. Бүгінде санаторлық-курорттық бағытқа сұраныс жоғары, және біз кәсіпорындар арасында тікелей байланыстар орнатуда үлкен әлеуетті көріп отырмыз. Мұндай бастамалар туристік ағынның өсуіне ғана емес, сондай-ақ экономикалық және мәдени байланыстардың нығаюына ықпал етеді», — деді ол.

Қол жеткізілген келісімдер Қазақстан мен Башқұртстан Республикасы арасындағы туризм, мәдениет және денсаулық сақтау салаларындағы ынтымақтастықты нығайтуға, сондай-ақ өзара туристік ағындарды дамытуға жаңа мүмкіндіктер жасауға ықпал етеді деп күтілуде.