Өңірлерде тұрғын үй құрылысын қалай дамыту керектігі ШҚО-да талқыланды

Шығыс Қазақстан облысы Кәсіпкерлер палатасында бизнес, мемлекеттік органдар және қаржы институттары өкілдерінің қатысуымен Құрылыс саласын дамыту жөніндегі кеңестің отырысы өтті.

Күн тәртібіндегі негізгі мәселе Бірыңғай оператор ретінде «Қазақстандық тұрғын үй компаниясы» АҚ ұсынған тұрғын үй құрылысын қолдау тетіктерін талқылау болды. Қатысушыларға құрылыс салушылар тарапынан тұрғын үй ұсынысын ынталандыруға және халық үшін оның қолжетімділігін арттыруға бағытталған қолданыстағы құралдар жан-жақты түсіндірілді.

Отырыс барысында үлестік құрылысқа кепілдік беру, кешенді құрылыс жобаларын қаржыландыру, сатып алу құқығымен жалға берілетін тұрғын үйді дамыту, сондай-ақ ипотекалық бағдарламалар сияқты тетіктер қарастырылды. Сонымен қатар тұрғын үй қорын реновациялаудың жаңа тәсілдері мен нарықтың ашықтығы мен қауіпсіздігін арттыруға бағытталған заңнамалық өзгерістерге ерекше назар аударылды.

 Бизнес өкілдері, әсіресе жаңа құрылыс жобаларын іске қосу үшін қосымша қолдау қажет өңірлерде, Бірыңғай оператор құралдарына қолжетімділікті кеңейтудің маңыздылығын атап өтті.

Өз кезегінде ШҚО Кәсіпкерлер палатасы директорының экономикалық мәселелер жөніндегі орынбасары Сәкен Абдуллин тұрғын үй құрылысын ынталандыруға, әкімшілік кедергілерді азайтуға және саланың инвестициялық тартымдылығын арттыруға бағытталған қосымша шараларды әзірлеу қажеттігін атап өтті.

Отырыс қорытындысы бойынша бірқатар ұсыныстар әзірленіп, олар құрылыс саласындағы мемлекеттік саясатты қалыптастыру кезінде қарастыру және ескеру үшін уәкілетті органдарға жолданатын болады.