Талдаудан тәжірибеге. «Ортақ Атамекен: Өңірден басталған өрлеу» өңірлік форумының екінші күні
«Атамекен» Ұлттық кәсіпкерлер палатасының «Ортақ Атамекен: Өңірден басталған өрлеу» өңірлік форумы Бурабайда өз жұмысын жалғастырды. Екінші күн Палатаның негізгі басқарушы буынын және бизнес өкілдерін – ҰКП Басқарма мүшелерін, орталық аппараттың басқарушы директорларын, барлық Өңірлік палата директорларын, Өңірлік кеңес төрағаларын және Төралқа мүшелерін біріктірді.
Екінші күннің жұмысы белгіленген күн тәртібінің қисынды жалғасы – қағидаттардан нақты шешімдерге көшу болды. Отырысты ашқан «Атамекен» ҰКП Төралқа Төрағасы Қанат Шарлапаев бірінші күннің қорытындысын шығарып, жүйе ішіндегі атқарушылық тәртіпті күшейтуге және қабылданған шешімдерді іске асыруға көшу қажеттігін атап өтті. Ол нәтиже үшін жеке жауапкершілікке және ішкі инвесторлармен жұмыс істеу құралдарын дамытуға ерекше назар аударды.
Оның айтуынша, «Өз ісімізді өзіміз белсенді түрде қолға алуымыз қажет», бұл ретте ол әңгіме «түбегейлі өзгерістер» туралы емес, реттеуші ортаны жақсарту мен бизнес үшін әкімшілік кедергілерді азайту бағытындағы жүйелі, күнделікті жұмыс туралы екенін айтты.
Негізгі тақырыптардың бірі цифрлық трансформация болды. Қазақстандағы жасанды интеллектті дамыту қауымдастығы басқарма төрағасының орынбасары Анар Төлеубаева ЖИ-ді Палата жұмысының тиімділігін арттыру құралы ретінде атады.
«Жасанды интеллект туралы сөз қозғағанда технологиядан емес, миссиядан бастау маңызды. Мәселе – негізгі қызметті тиімді орындау, мемлекет пен бизнес арасында көпір болу», – деді ол.
Оның айтуынша, 2,2 миллионнан астам ШОБ субъектісі бар жағдайда дәстүрлі тәсілдер мұндай ауқымда тиімді жұмыс істеуге мүмкіндік бермейді.
«ЖИ сарапшыны алмастырмайды, керісінше, шешімдерді жылдамырақ табуға, бағыттауға және дайындауға көмектеседі», – деп атап өтті спикер.
Ол қолданбалы бағыттарды: кәсіпкердің цифрлық ассистенті, өтініштерді интеллектуалды бағдарлау және «бизнес дауысының» аналитикасын айқындады.
Практикалық экономика тақырыбын Қазақстан инвесторлар одағы басқармасының төрағасы Рустам Жүрсінов жалғастырып, елдің инвестициялық ахуалы туралы баяндады. Ол инвесторлар кездесетін жүйелік кедергілерге назар аударып, бизнес пен мемлекеттік органдар арасында келісілген шешімдер әзірлеу қажеттігін атап өтті.
Институционалдық даму бағыты Ұлттық корпоративтік басқару кеңесінің төрағасы Қамбар Омаровтың сөзінде жалғасын тапты. Ол Кеңес жұмысының қайта іске қосылғанын және құрамының жаңартылғанын, оған мемлекеттік органдар, квазимемлекеттік сектор және тәуелсіз сарапшылар кеңінен тартылғанын хабарлады.
«Бұл – корпоративтік басқару сапасын жүйелі түрде арттыра алатын тұрақты құрылым қалыптастыру туралы», – деді ол.
Жаңартылған жұмыс аясында нормативтік базаны жетілдіруді, ESG күн тәртібін дамытуды, талдамалық қызметті күшейтуді және институционалдық нығайтуды қамтитын жол картасы бекітілді. Өңірлерде корпоративтік басқару стандарттарын енгізуге ерекше назар аударылады.
Сөз соңында Қамбар Омаров күш біріктірудің маңызын атап өтті:
«Жылдам жүргің келсе – жалғыз жүр, ал алысқа барғың келсе – бірге жүр».
Екінші күннің қорытынды кезеңі үздік өңірлік тәжірибелермен алмасуға арналды. Астана, Алматы, Қостанай және Маңғыстау облыстары кәсіпкерлер палаталарының директорлары жергілікті атқарушы органдармен өзара іс-қимыл, бизнес құқығын қорғау және сервистік модельді енгізу бойынша нақты кейстерді ұсынды. Бұл мысалдар форумның басты қағидатын айқын көрсетті – «Атамекеннің» дамуы өңірлерден басталады.
Жалпы алғанда, екінші күн талқылаудан нақты іс-әрекетке көшудің – цифрлық құралдарды енгізуден бастап инвестициялық ахуалды жақсарту мен институционалдық тетіктерді дамытудың маңызын көрсетті. Әзірленген ұсыныстар мен практикалық кейстер Қазақстанда бизнес жүргізу жағдайларын тұрақты түрде жақсартуға бағытталған форумның қорытынды қарарының негізіне алынады.