Атырауда кәсіпкер өз мүлкін қайтаруды талап етуде
Кәсіпкер мен мемлекеттік органдар арасындағы, өтініш берушінің айтуынша заңды негізсіз тәркіленген мүлікке қатысты даулы мәселе Атырау облысы Кәсіпкерлер палатасы жанындағы Кәсіпкерлердің құқықтарын қорғау және сыбайлас жемқорлыққа қарсы іс-қимыл жөніндегі кеңестің отырысында қаралды.
Жеке кәсіпкер Азамат Тілепқалиевтің айтуынша, 2026 жылғы 3 сәуірде қалалық әкімдік пен полиция өкілдері оған тиесілі балалар аттракционы — жылжымалы карусельді алып қойған. Оның сөзінше, бұл ретте ешқандай процессуалдық құжаттар рәсімделмеген.
«Карусельді өз қаражатыма сатып алдым. Қазір менің мүлкімді әкімдік өкілдері ешқандай әкімшілік хаттама толтырмай алып қойды. e-Өтініш арқылы барлық жерге жаздым, бірақ нәтиже жоқ — бір органнан екіншісіне жібере береді. Егер мен тәртіп бұзсам — айыппұл салып, мүлкімді қайтарсын. Қазір оны жай ғана ұстап отыр. Карусель жылжымалы, ешкімге кедергі келтірмейді. Қандай құжаттар керек екенін айтсын — бәрін тапсырамын. 20 күннен асты, мені барлық жерде сенделтіп жүр», — деді кәсіпкер.
Өтініш берушінің айтуынша, әкімшілік құқық бұзушылық туралы хаттама толтырылмаған, әкімшілік іс қозғалмаған және сот шешімі жоқ.
Атырау облысы Кәсіпкерлер палатасы директорының орынбасары, Қазақстан Кәсіпкерлерінің құқықтарын қорғау жөніндегі уәкілінің Атырау облысы бойынша сектор меңгерушісі Сәрсенбай Жолдыбаевтың айтуынша, мүлікті алып қою құқықтық негізсіз, еркін нысанда жасалған актімен рәсімделген. Құжатты қалалық кәсіпкерлік және ауыл шаруашылығы бөлімінің басшысы жасап, оған полиция қызметкерлері қол қойған.
«Мәселені мүмкіндігінше сотқа дейінгі тәртіппен реттеу үшін кеңеске шығардық. Әйтпесе сот органдарына жүгінеміз. Лауазымды тұлғалардың әрекеттерінің заңдылығын қадағалау органдары тексеруі тиіс», — деді Сәрсенбай Жолдыбаев.
Қалалық кәсіпкерлік және ауыл шаруашылығы бөлімінің сектор меңгерушісі Замзағүл Шалабаева қалада қоғамдық орындардағы бизнестің заңдылығын тексеретін арнайы жұмыс тобы жұмыс істейтінін түсіндірді.
«Қалалық әкімнің өкімімен құрылған жұмыс тобы бар, ол қоғамдық орындарда — саябақтарда, жағалауда, алаңдарда кәсіпкерлік қызметтің заңдылығын тексереді. Біз бизнес субъектілеріне түсіндіру жұмыстарын жүргіземіз. Мұндай тексерулер тұрақты түрде өтеді. Бұл жағдай бойынша нақты ештеңе айта алмаймын, өйткені мен ол жерде болған жоқпын. Егер оның барлық құжаттары дұрыс болса, мүлкін еш қиындықсыз қайтарып ала алады», — деді ол.
Қала прокуратурасында кәсіпкердің өтініші қарауға алынғаны расталды.
«Өтініш бар, қазір қаралу үстінде. Тексеру жүргізіледі, жағдай жан-жақты зерделеніп, белгіленген мерзімде жауап беріледі», — деді Атырау қаласы прокуратурасының өкілі Нұрболат Рзабек.
Кеңес отырысының қорытындысы бойынша материалдарды алдын ала талдау лауазымды тұлғалардың өкілеттіктерін асыра пайдалану және теріс пайдалану, сондай-ақ өз бетінше әрекет ету белгілерінің болуы мүмкін екенін көрсетті. Сонымен қатар, олардың әрекеттері кәсіпкерлік қызметке заңсыз араласу ретінде бағалануы мүмкін. Бұл фактілерді қадағалау органы тексеріп, заң бұзушылықтар расталған жағдайда Палата кәсіпкердің құқықтарын сотта қорғауға қолдау көрсетеді.
