«Генерал болуды армандайтын сарбаздар»: Павлодарлық «Атамекен» палатасы бизнесті дамыту турын қолдады
Павлодарда бизнесті дамыту жөніндегі республикалық тур аясында кәсіпкерлермен кездесу өтті. Тур 6 сәуірден 4 мамырға дейін жалғасуда. Жоба Қазақстанның Ұлттық кәсіпкерлер палатасы «Атамекен» және Орталық Азия Франчайзинг қауымдастығы (Central Asian Association of Franchising (CAAF)) тарапынан жүзеге асырылуда.
Республиканың кәсіпкерлеріне арналған, бизнесті дамыту мен кеңейтуге бағытталған бұл ауқымды турды бастаған ҚР ҰКП-ның негізгі міндеті – кәсіпкерлерді қолдау және жоғары нәтижелерге қол жеткізуге көмектесу, деп атап өтті Павлодар облысы кәсіпкерлер палатасының директоры Ерқанат Әбенов.
«Бүгінгі кездесудің маңызды тақырыбы – бизнесті масштабтау, яғни жергілікті брендтен республикалық немесе әлемдік деңгейдегі брендке қалай айналуға болады. Айтылғандай, генерал болуды армандамайтын сарбаз жаман. Іс-шарада кәсіпкерлерді қолдауға бағытталған стратегиялар мен жобалар да таныстырылды: брендтерді күшейту және жаңа байланыстар орнату», – деді «Атамекен» ӨКП директоры.
100-ден астам мүдделі кәсіпкерді жинаған кездесуде шағын және орта бизнес субъектілеріне арналған «KazBrand» ұлттық байқауына ерекше назар аударылды: оған қатысу шарттары мен жобаның пайдасы түсіндірілді.
Турдың бастамашыларының бірі – ҚР ҰКП ШОБ дамыту комитетінің төрайымы Гүлбану Майгарина. Оның айтуынша, «KazBrand» байқауы аясындағы мұндай өңірлік сапарды команда екінші жыл қатарынан өткізіп келеді. Гүлбану Майгаринаның байқауына қарағанда, шағын және орта бизнеске білім айтарлықтай жетіспейді. Кәсіпкерлер талантты, көптеген сапалы өнімдер мен жобалар жасаған. Алайда кейде оларды дұрыс ұсына алмайды. «KazBrand» байқауының мақсаты – өңірлік бизнес-жобаларды кәсібилендіріп, ұлттық деңгейге жеткізу, кейін халықаралық нарыққа шығару.
«Мен біліммен бөлісуге өте қуаныштымын, өйткені мен «Атамекен» ҰКП ШОБ дамыту комитетінің төрайымымын және тәжірибем жеткілікті. Біз 2018 жылы нөлден бастадық, ал бүгінде желімізде 3000-ға жуық адам жұмыс істейді, сондай-ақ көптеген қоғамдық жұмыстар жүргізілуде», – деді кәсіпкер әйел.
Кәсіпкерлер алдында бизнес-қоғамдастық өкілдерінен бірқатар спикерлер сөз сөйледі.
Осындай тегін кездесулер тур аясында Қазақстанның 17 қаласында өтеді, Павлодар – он бесінші қала. Ұйымдастырушылардың айтуынша, бұл іс-шараларда сарапшылар тәжірибелік біліммен бөлісіп, бизнесті ұйымдастыру, филиалдар ашу, басқа қалаларға шығу және франчайзинг арқылы бизнесті кеңейту мүмкіндіктері туралы айтады.
Тур бағдарламасы өсім нүктелерін анықтауға және нақты мысалдар арқылы мәселелерді талдауға бағытталған. Қатысушылар бизнес-процестерді жүйелеу, есеп жүргізу мен басқаруды жолға қою, сондай-ақ бизнесті франчайзинг форматына дайындау тәсілдерін меңгереді.