Атырауда дуалды оқыту тәлімгерлеріне арналған семинар өтті

Өңірде экономиканың нақты секторы үшін сұранысқа ие мамандарды даярлауға бағытталған дуалды оқыту жүйесін дамыту жалғасуда. Кезекті оқыту семинары Өңірлік кәсіпкерлер палатасы жанындағы «Тәлімгерлік мектебі» аясында ұйымдастырылды.

Сабақтар Атырау энергетика және құрылыс колледжінің конференц-залында өтті. Оқытуға дуалды білім беру жүйесіне тартылған кәсіпорындар мен колледждердің 17 қызметкері қатысты. Бағдарлама дуалды оқытуды енгізудің халықаралық тәжірибесінен бастап, 2025 жылы бекітілген тәлімгердің кәсіби стандарты сияқты негізгі нормативтік құжатты зерделеуге дейінгі кең ауқымды тақырыптарды қамтыды.

Тыңдаушылар сондай-ақ Қазақстан Республикасының қолданыстағы заңнамалық базасымен, өндірістік тәжірибеден өтуші студенттермен жұмыс істеудің педагогикалық әдістерімен және өндірістегі жанжалды жағдайларды шешу құралдарымен танысты.

Семинар қатысушыларының бірі, «Атырау жылу электр орталығы» АҚ тарату құрылғыларына қызмет көрсету шебері Аслан Ержановтың айтуынша, оқу тек теорияға ғана емес, тәжірибеге бағытталған болды.

«Біз дуалды оқыту жүйесі мен кәсіпорындағы тәлімгердің рөлі туралы жүйелі түсінік алдық. Әсіресе нақты жағдайларды талдау және студенттермен өзара әрекеттесу әдістері пайдалы болды. Бұл білімдер күнделікті жұмысымызда міндетті түрде қажет болады», — деп өз пікірін білдірді Аслан Ержанов.

Курс тренері, Атырау облысы Кәсіпкерлер палатасының сарапшысы Амангелді Иманов мұндай бағдарламалардың кадрлық әлеуетті тұрақты дамыту үшін маңыздылығын атап өтті.

«Тәлімгер — дуалды оқыту жүйесіндегі негізгі тұлға. Оның құзыреттеріне байланысты студенттің өндірістік ортаға қаншалықты тез әрі сапалы бейімделетіні анықталады. Біздің міндетіміз — тәлімгерлерге тек теориялық база ғана емес, тиімді жұмыс істеуге арналған практикалық құралдарды да беру», — деді ол.

Қатысушылар тақырыпқа жоғары қызығушылық танытып, талқылауларға белсенді қатысты. Оқыту қорытындысы бойынша барлық тыңдаушыларға сертификаттар табысталды.