Шығыс Қазақстан банкпен серіктестік арқылы кәсіпкерлерді қолдауды күшейтуде

Шығыс Қазақстан облысының Кәсіпкерлер палатасы мен Freedom Bank Kazakhstan АҚ-ның Өскемен қаласындағы филиалы өңірдегі кәсіпкерлікті дамытуға бағытталған өзара ынтымақтастық туралы меморандумға қол қойды.

Меморандумға сәйкес, тараптар бірқатар негізгі бағыттар бойынша ынтымақтастықты дамытуға ниетті. Олардың қатарында кәсіпкерлерді жаңа банк өнімдері туралы ақпараттандыру, қаржылық қызметтерді ұсыну тиімділігін арттыру, бірлескен дөңгелек үстелдер, көрмелер мен іскерлік кездесулер ұйымдастыру, сондай-ақ бизнестің өзекті мәселелері бойынша ақпарат алмасу бар.

ШҚО Кәсіпкерлер палатасының директоры Кайрат Мамырбаев атап өткендей, бизнеске тек мемлекеттік қолдау шаралары ғана емес, сонымен қатар заманауи қаржылық құралдарға қолжетімділік те қажет.

Оның айтуынша, бірлескен жұмыс ең алдымен кәсіпкерлерге практикалық қолдау көрсетуге бағытталады.

«Шығыс Қазақстан кәсіпкерлерінің қаржыландырудың қолжетімді құралдары туралы ақпаратты уақтылы алуы, кеңес беру қолдауы және бірлескен жобалар мен іс-шараларға қатысу мүмкіндігі біз үшін маңызды. Мұндай әріптестік тұрақты әрі қолайлы бизнес ортаны қалыптастыруға ықпал етеді», - деді Кайрат Мамырбаев.

Тараптар сондай-ақ туындауына қарай бірлескен бастамалар мен жобаларды іске асыру мүмкіндіктерін қарастыруға уағдаласты. Сонымен қатар бизнес өкілдері үшін семинарлар, конференциялар, сараптамалық кездесулер мен консультациялық іс-шаралар өткізуге ерекше назар аударылады.