СҚО-да «Бір ауыл – бір өнім» көрме-жәрмеңкесі өтті

Петропавл қаласында «Бір ауыл – бір өнім» (БАБӨ) жобасы аясында жыл сайынғы дәстүрлі көрме-жәрмеңке өтті. Солтүстік Қазақстан облысының Кәсіпкерлер палатасы ұйымдастырған бұл шараға биыл облыс орталығы мен аудандардан келген 42 тауар өндіруші қатысып, өз жетістіктерін көрсетті.

БАБӨ жобасын «Атамекен» Ұлттық кәсіпкерлер палатасы 2021 жылдан бері жүзеге асырып келеді. Бастаманың басты мақсаты – жергілікті шикізаттан жасалған өнімдерді ілгерілету және танымал өңірлік брендтерді қалыптастыру.

Қатысушыларға СҚО Кәсіпкерлер Палатасы директорының орынбасары Марат Ысқақов құттықтау сөз сөйледі.

«Бұл жоба дәстүрлерді сақтай отырып және туған өлкенің әлеуетін аша отырып, жергілікті шикізаттан өнімдерді сүйіспеншілікпен жасайтын адамдарды біріктіреді. БАБӨ идеясы Жапонияда JICA агенттігінің қолдауымен басталды және бүгінде ол Қазақстанда сәтті дамып келеді. Жобаның басты құндылығы-адамдар. Өз еңбегімен ауылдар мен қалаларды дамытып, жұмыс орындарын құрып, аймақ экономикасын нығайтады", - деп атап өтті Марат Ысқақов.

Жәрмеңкеде өнімдердің кең ассортименті ұсынылды: табиғи сүт пен ет, бал, кондитерлік және нан-тоқаш өнімдері,  ұлттық киім, тоқыма бұйымдары, кәдесыйлар, сондай-ақ ағаш пен былғарыдан жасалған бұйымдар.

Көрмеге келушілердің ерекше ықыласына бөленгендердің бірі – «ASYL KIIZ» брендінің негізін қалаушы Айжан Дайыр болды. Оның табиғи киізден жасаған кеудешелері, палантиндері мен бас киімдерінің авторлық коллекциясы көптің назарын аударды.

«Менің мақсатым – ұмытыла бастаған дәстүрлі киіз басу өнерін қайта жаңғырту. Жүн өңдеуден бастап, соңғы әшекейіне дейінгі барлық процесс толығымен қолмен жасалады. Бұл – ұлттық нақыш пен заманауи дизайнды ұштастыратын өте қажырлы еңбек», – дейді Айжан.

Қолөнершінің айтуынша, қазір жоба мамандандырылған жабдықтың жоқтығына байланысты, сондықтан қол еңбегі әлі тұрақты табыс әкелмейді. Айжан өндірісті жаңғыртуға грант алу үшін жеңімпаздар қатарына қосылуға үміттенеді. Бұл жүнді өңдеуді жақсартады, бірақ негізгі құндылықты сақтайды - жүз пайыз қолмен жұмыс.

Мамлют ауданынан келген Юлия Бикина жәрмеңкеге өзінің төсек-орын бұйымдарын ала келген. Оның құс мамығынан өнім жасап жүргеніне бес жылдан асқан.

«Біздің көрпелеріміз, жастықтарымыз бен мамық төсектерімізге тек Қазақстанда ғана емес, шет елдерде де сұраныс жоғары. Франция, Германия, Сочи қалаларынан арнайы тапсырыстар түседі. Мамықты тек жергілікті фермерлерден сатып аламыз, оны мұқият өңдеп, әзірге тек тапсырыс бойынша ғана тігеміз», – деді Юлия.

Ал Қызылжар ауданындағы Надёжка ауылының тұрғыны Александр Волобуев көрмеге үй жағдайында дайындалған ет деликатестерін ұсынды.

«Шұжықтарды, ысталған және кептірілген ет өнімдерін, сондай-ақ құйрық майды өз қолыммен дайындаймын. Шикізатты ауыл тұрғындарынан аламын. Өнімдерім толығымен табиғи, ешқандай жасанды қоспасыз. Қазірше тапсырыспен жұмыс істеп жатырмын, бірақ алдағы уақытта бизнесімді кеңейту жоспарда бар», – деді кәсіпкер.

Көрме қорытындысы бойынша сарапшылар комиссиясы байқаудың екінші кезеңіне өтетін 20 жартылай финалисті анықтайды. Енді олар өңірлік бренд-комитет алдында өздерінің бизнес-жобаларын қорғап шығуы тиіс.

Көрмеден кейін сарапшылар комитеті байқаудың екінші кезеңіне өтетін 20 жартылай финалистті таңдайды. Олар өз бизнес жобаларын аймақтық бренд комитетіне ұсынады. Тек ең үздіктері ғана Солтүстік Қазақстан облысын БАБӨ ұлттық кезеңінде таныстыруға және кеңейіп, үлкен нарықтарға шығудың жаңа мүмкіндіктерін ашуға мүмкіндік алады. «Бір ауыл – бір өнім» жобасының жеңімпаздары да өз бизнесін дамыту үшін 5 миллион теңге грантқа үміткер бола алады.