Өскеменде She Impact Kazakhstan семинары өтті: әйелдер, идеялар және өңірлерге арналған жаңа мүмкіндіктер

Өскемен қаласында кәсіпкерлерді, қоғам белсенділерін, сарапшыларды және жеке кәсібін дамытуға қызығушылық танытқан әйелдерді біріктірген She Impact Kazakhstan республикалық жобасының білім беру іс-шарасы өтті.

Ұйымдастырушылардың айтуынша, She Impact Kazakhstan - бұл жай ғана кездесулер сериясы емес, Қазақстанның барлық өңірін қамтитын ауқымды ұлттық бастама. Жоба аясында қатысушылар өз бастамаларын іске қосу және ауқымын кеңейту үшін білім, тәжірибелік құралдар мен қолдауға ие болады.

Күні бойы қатысушылар креативті экономиканың заманауи трендтерін, бизнесте жасанды интеллектіні қолдану мүмкіндіктерін, франчайзинг, әлеуметтік кәсіпкерлік және зияткерлік меншікті қорғау мәселелерін талқылады. Ерекше назар инклюзивті жобаларды дамытуға және өңірлердегі әйелдерге арналған тұрақты бизнес-модельдерді құруға аударылды.

Жобаның ұйымдастырушысы әрі жетекшісі, әлеуметтік кәсіпкерлік, инновациялар және зияткерлік меншік саласының сарапшысы Елена Куликова қатысушыларға идеяны тұрақты табыс әкелетін толыққанды жобаға айналдырудың нақты құралдарын таныстырды.

Шығыс Қазақстан облысы кәсіпкерлер палатасы Адами капиталды дамыту бөлімінің басшысы Асет Адылхан бүгінде кәсіпкерлікке, әсіресе әлеуметтік және креативті салада, жаңа тәсілдер қажет екенін атап өтті. Оның айтуынша, мұндай жобалар әйелдерге тек өз кәсібін ашуға ғана емес, сонымен қатар жаңа жұмыс орындарын құруға, өңірлерді дамытуға және бизнес-процестерге заманауи технологияларды енгізуге мүмкіндік береді.

Форумға қатысушылардың айтуынша, іс-шара көпшілік үшін жаңа таныстықтар орнатуға, серіктестер табуға және шабыт алуға арналған алаңға айналды.

«Мен шағын әлеуметтік жоба идеясымен келдім, ал нақты бизнеске айналдыру жолдарын түсініп қайттым. Әсіресе жасанды интеллект пен цифрлық құралдар арқылы ілгерілету тақырыптары өте пайдалы болды», - деп бөлісті шара қатысушыларының бірі.