Қарағанды облысының кәсіпорындары Қырғызстанда ТМД-ның беделді марапаттарына ие болды
Қарағанды облысының екі кәсіпорны өнім мен көрсетілетін қызметтердің сапасы саласындағы жетістіктері үшін Тәуелсіз Мемлекеттер Достастығының (ТМД) сыйлығының лауреаты және дипломанты атанып, халықаралық деңгейде мойындалды. Қарағанды облысы Кәсіпкерлер палатасының жәрдемдесуі және Техникалық реттеу және метрология комитетінің (КТРМ) қолдауымен олар халықаралық байқауда Қазақстанның абыройын асқақтатты. Салтанатты марапаттау рәсімі Қырғызстанда Стандарттау, метрология және сертификаттау жөніндегі мемлекетаралық кеңестің 69-отырысы аясында өтті.
«НПО Дефектоскопия» ЖШС ТМД сыйлығының лауреаты атанды. Кәсіпорын мұнай-газ, тау-кен, металлургия және энергетика салаларындағы нысандарды диагностикалау және бақылау жұмыстарымен айналысады.
Ал «Бёмер Арматура» ЖШС ТМД сыйлығының дипломанты атанды. «Сарыарқа» арнайы экономикалық аймағында орналасқан зауыт шарлы крандар шығарады және өңірдегі жетекші өнеркәсіп кәсіпорындарының бірі саналады.
Қарағанды облысы Кәсіпкерлер палатасы өңір кәсіпорындарының сапа саласындағы байқауларға қатысуына тұрақты түрде қолдау көрсетіп келеді. Палата отандық өндірушілерді ілгерілетуге, сапа мәдениетін дамытуға және кәсіпорындардың бәсекеге қабілеттілігін арттыруға бағытталған жұмыстарды жүйелі түрде жүргізеді. Соның нәтижесінде өңір кәсіпорындары өз әлеуетін елімізде ғана емес, халықаралық деңгейде де танытуға мүмкіндік алып отыр.
Еске сала кетейік, 2025 жылғы ТМД сыйлығын беру туралы шешім Мәскеуде өткен ТМД Экономикалық кеңесінің отырысында қабылданған болатын. Халықаралық кезеңге дейін екі кәсіпорын да Қазақстандағы ұлттық іріктеуден сәтті өтіп, өз өнімдері мен қызметтерінің жоғары сапасын дәлелдеді.
ТМД сыйлығы – Достастық кеңістігіндегі ең беделді марапаттардың бірі. Ол заманауи басқару әдістерін енгізіп, инновациялық технологияларды қолданып, өнімдері мен көрсетілетін қызметтерінің жоғары сапасын қамтамасыз етіп отырған ұйымдарға табысталады.
– Кәсіпорындарымыздың ТМД деңгейіндегі жетістігі өңірлік бизнестің зор әлеуетін, халықаралық нарықта бәсекеге қабілетті екенін және ең жоғары сапа стандарттарына сай жұмыс істейтінін көрсетеді, – деді Қарағанды облысы Кәсіпкерлер палатасының директоры Ернар Күлпейісов.
Алынған марапаттар Қарағанды облысы кәсіпорындарының Қазақстанды халықаралық деңгейде лайықты танытып, өңірде өндірілетін өнімнің жоғары сапасы мен бәсекеге қабілеттілігін тағы бір мәрте дәлелдеді.