«Атамекен» ҰКП алаңында платформалық жұмыспен қамту мәселелері жөніндегі Жұмыс тобының алғашқы отырысы өтті
Бүгін «Атамекен» Ұлттық кәсіпкерлер палатасы алаңында ҰКП Төралқа Төрағасы Қанат Шарлапаевтың жетекшілігімен платформалық жұмыспен қамту мәселелері жөніндегі жұмыс тобының алғашқы отырысы өтті. Жиынға ҚР Еңбек және халықты әлеуметтік қорғау министрі Асқарбек Ертаев, салалық министрліктер мен ведомство басшылары, сондай-ақ ірі интернет-платформалардың өкілдері қатысты.
Бірлескен жұмыстың басты мақсаты – кәсіпкерлік қоғамдастықтың ұсыныстарын жинақтап, мемлекеттік органдармен бірлесіп цифрлық нарық үшін теңгерімді қағидаларды әзірлеу.
Кездесуді аша отырып, «Атамекен» ҰКП Төралқа Төрағасы Қанат Шарлапаев цифрлық экономиканың қарқынды дамып келе жатқанын, бұл еңбек нарығы үшін жаңа мүмкіндіктер қалыптастырып отырғанын атап өтті. Алайда сонымен қатар салық салу, әлеуметтік кепілдіктер және орындаушылардың құқықтық мәртебесін айқындауға қатысты сын-қатерлер де артып келеді.
«Бүгінгі міндетіміз – кейіннен мемлекеттік реттеудің негізіне айналуы мүмкін бірыңғай тәсілдерді әзірлеу. Реттеу теңгерімді болуға тиіс. Азаматтардың құқығын қорғауды, цифрлық экономиканың дамуын және сонымен бірге бизнестің әрі интернет-платформалардың дамуын тежейтін артық талаптардың туындауына жол бермеуді қамтамасыз ету қажет. Барлық шешімдер құқық қолдану тәжірибесін және экономикалық салдарды талдау негізінде қабылдануға тиіс», – деді Ұлттық палата басшысы.
Өз сөзінде ҚР Еңбек және халықты әлеуметтік қорғау министрі Асқарбек Ертаев осы саланы дамытудың негізгі бағыттарын атап өтті.
«Платформалық жұмыспен қамтуды реттеудің заманауи әрі түсінікті жүйесін қалыптастыру маңызды. Тек осылай ғана біз қазақстандықтардың сенімді әлеуметтік қорғалуын қамтамасыз етіп, сонымен қатар цифрлық экономиканың өсуін ынталандыра аламыз», – деп атап өтті.
Отырыс барысында қатысушылар азаматтарды экономиканың формалды секторына тарту және әлеуметтік қорғау шараларын жетілдіру мәселелерін қарастырды. Арнаулы салық режимі шеңберінде жүзеге асырылатын қызмет түрлерінің тізбесін кеңейту, сондай-ақ өзін-өзі жұмыспен қамтыған азаматтарға чектерді жеңіл қалыптастыру үшін қызметтер анықтамалығын өзектендіру арқылы салықтық әкімшілендіруді оңтайландыруға ерекше назар аударылды.
Сонымен қатар платформалық жұмыспен қамтуды дәстүрлі еңбек қатынастарынан ажырату тәсілдері талқыланды. Қатысушылар тараптардың өзара қатынастарының нақты мазмұнына негізделген айқын өлшемшарттарды айқындау қажеттігін атап өтті. Бұдан бөлек, интернет-платформалардың тізілімін жүргізу, шетел азаматтарының жұмысын реттеу, кәмелетке толмағандардың цифрлық жобаларға қатысуы және екінші деңгейлі банктер арқылы әлеуметтік төлемдерді аудару тәртібі қаралды.
Өз кезегінде, кәсіпкерлік қоғамдастық пен онлайн-платформалардың өкілдері белсенді түрде өз пікірлерін білдіріп, платформалық еңбектің икемділігін сақтау қажеттігін атап өтті. Сонымен қатар, бизнес қоғамдастығы цифрлық платформалар үшін экономикалық қызмет түрлерінің жалпы жіктемесінің бөлек нұсқасын енгізу бастамасын көтерді, бұл олардың қызметін дәлірек жіктеуге және салық салу мен реттеу тұрғысынан нарықтың ерекше белгілерін ескеруге мүмкіндік береді.
Отырыс қорытындысы бойынша платформалық жұмыспен қамту саласындағы Қазақстан Республикасының нормативтік-құқықтық базасын жаңғырту және жетілдіруге бағытталған бірлескен жұмыстың алдағы негізгі бағыттары айқындалды.