«Dastan» компаниялар тобы бизнеске қолайлы жағдай жасап, Ақтөбенің дамуына инвестиция салуда

Ақтөбе облысына жұмыс сапары барысында «Атамекен» ҚР ҰКП Басқарма Төрағасының орынбасары Аслан Қалиғазинге өңірдің өнеркәсіптік инфрақұрылымын дамытуға және инвестиция тартуға бағытталған «Dastan» компаниялар тобының жобалары таныстырылды.

Солардың бірі – 2011 жылы құрылған «Dastan» сервистік-индустриялық паркі.

Бүгінде бұл аумағы 15,5 гектарды құрайтын дайын өндірістік алаң. Мұнда кәсіпкерлер инженерлік инфрақұрылымды жүргізуге уақыт пен қомақты қаржы жұмсамай-ақ өндіріс орындарын қысқа мерзімде іске қоса алады.

Парк халықаралық «Батыс Еуропа – Батыс Қытай» көлік дәлізінің бойында орналасқан. Бұл резиденттерге тиімді логистика ұйымдастыруға және Қазақстан, Ресей, Орталық Азия елдері мен Еуропа нарықтарына шығуға мүмкіндік береді.

Резиденттер үшін барлық қажетті инфрақұрылым қарастырылған: 13 вагонға арналған жеке теміржол тұйығы, қуаты 2 МВт-қа дейінгі электрмен жабдықтау жүйесі, магистральдық газ құбырына қосылу мүмкіндігі, резервтік су жинау жүйесі бар жеке су ұңғымасы, жоғары жылдамдықты талшықты-оптикалық интернет және тәулік бойы күзет қызметі.

Дайын инфрақұрылымның арқасында кәсіпкерлер жобаларын іске қосу мерзімін қысқартып, бастапқы шығындарын азайтып, бизнесті дамытуға басымдық бере алады.

Бүгінде парк аумағында бірнеше кәсіпорын жұмыс істейді, ал өндірістік алаң жаңа серіктестер мен инвесторларды тартуды жалғастыруда.

ҰКП өкілдерінің айтуынша, мұндай жобалар жеке инвестициялардың бизнеске қолайлы орта қалыптастыруға, өндірістік кооперацияны дамытуға және өңірдің инвестициялық тартымдылығын арттыруға ықпал ететінінің жарқын мысалы болып табылады.

Сондай-ақ қонақтарға DASTAN LESNOE аумағын кешенді игеруге арналған инвестициялық қала құрылысы жобасы таныстырылды. Бұл – өзінің әлеуметтік және коммерциялық инфрақұрылымы бар жаңа қалалық аудан.

Ақтөбеде салынып жатқан жаңа футбол стадионы мен театр маңындағы 50 гектардан астам аумақта жайлы өмір сүруге, жұмыс істеуге және кәсіпкерлікпен айналысуға арналған толыққанды экожүйе құру жоспарланған.

Жоба аясында коттедж қалашығы, тұрғын үй кешендері, бизнес-орталық, заманауи STEM-мектеп, спорт кешені, табиғи су айдыны бар саябақ, сондай-ақ сауда және қызмет көрсету нысандары салынады.

Жобаның алғашқы кезеңі – коттедж қалашығын салуға 1,2 млрд теңге инвестиция бағытталды.

Қазіргі таңда алғашқы бес үйдің құрылысы аяқталуға жақын. Сонымен қатар аумақты абаттандыру және инженерлік желілерді тарту жұмыстары жүргізілуде.

«Бұл екі жоба да Ақтөбе кәсіпкерлерінің тек өз бизнестерін дамытуға ғана емес, сонымен қатар басқа кәсіпкерлер үшін заманауи инфрақұрылым қалыптастыруға да инвестиция салуға дайын екенін көрсетеді. Мұндай бастамалар жаңа өндірістердің ашылуына, инвестиция тартуға, жаңа жұмыс орындарының құрылуына және өңір экономикасының тұрақты дамуына жаңа мүмкіндіктер ашады», – деді Ақтөбе облысы Кәсіпкерлер палатасының директоры Дидар Боранқұлов.