Қаржылық сауаттылық – теория емес, бизнесті дамытудың тиімді құралы

Бүгін Өскемен қаласында «Даму» кәсіпкерлікті дамыту қоры мен Банк ЦентрКредиттің қолдауымен белгілі бизнес-тренер Дмитрий Казанцевтің қатысуымен қаржылық сауаттылық тақырыбында семинар өтті. Іс-шараға кәсіпкерлер, мемлекеттік және қаржы институттарының өкілдері, сондай-ақ Шығыс Қазақстан облысы Кәсіпкерлер палатасының мамандары қатысты.

Семинар кәсіпкерлер тарапынан үлкен қызығушылық тудырды – зал толықтай толды. Бірнеше сағат бойы қатысушылар жеке және корпоративтік қаржыны басқару, жинақ қалыптастыру, инвестициялық құралдардың жұмыс істеу тетіктері, қаржылық алаяқтықтан қорғану және бюджетті тиімді жоспарлау мәселелерін талқылады.

ШҚО Кәсіпкерлер палатасы директорының экономикалық мәселелер жөніндегі орынбасары Сәкен Абдуллиннің айтуынша, мұндай кездесулер бүгінде ерекше маңызға ие. Себебі кәсіпкерлер жоғары экономикалық белгісіздік жағдайында қаржылық шешімдер қабылдауға мәжбүр.

Қатысушылардың ерекше назарын қаржылық қауіпсіздік қорын қалыптастыру тақырыбы аударды. Дмитрий Казанцевтің бұл жөніндегі кеңестерінің бірі аудиторияда қызу талқылауға себеп болды.

«Маған қаржылық қауіпсіздік қоры туралы мысал ерекше әсер етті. Тренер жинақтарыңыз туралы айналаңыздағы адамдарға айтпауға кеңес берді. Мұның шын мәнінде қисыны бар. Адамдар сіздің қаржылық қорыңыз бар екенін білген сәтте қарыз сұрау немесе материалдық көмек көрсету жөнінде өтініштер жиілей бастайды. Жақын адамдарға «жоқ» деу оңай емес, ал берілген қарызды кейін қайтарып алу одан да қиын. Әсіресе оның қарапайым, бірақ өте дәл айтқан сөзі есте қалды: «Көлігіңіздегі қауіпсіздік жастығын ешкімге бермейсіз ғой. Ендеше неге өзіңіздің қаржылық қауіпсіздік жастығыңызды беруге дайынсыз?», – деп бөлісті семинарға қатысушы Аяужан Әшімова.

Кәсіпкерлер семинардың практикалық маңызын да ерекше атап өтті.

«Көптеген кеңестерді ертеңнен бастап-ақ қолдануға болады. Әсіресе шығындарды есепке алу және жинақ қалыптастыру жөніндегі ұсыныстар өте пайдалы болды. Кейде ақша жинауға мүмкіндік жоқ сияқты көрінеді. Бірақ семинардан кейін мәселе табыстың көлемінде емес, қаржылық тәртіпте екенін түсінесің», – деді Анна Ковалева.

Кәсіпкер Ерлан Нұрғалиев қаржылық алаяқтықтың көбеюі мен қаражаттың сақталуы мәселесіне тоқталды.

«Маған спикердің қарапайым тілмен сөйлеп, өмірден алынған нақты мысалдар келтіргені ұнады. Әсіресе қаржылық алаяқтар мен кең таралған инвестициялық схемалар туралы тақырып өте өзекті болды. Бүгінде кәсіпкер үшін тек табыс табу ғана емес, сонымен қатар өз қаражатын сақтай білу де маңызды», – деді ол.

Қатысушылар қаржылық сауаттылықтың әлдеқашан тек жеке адамның мәселесі болудан қалғанын атап өтті. Кәсіпкер үшін ақша ағындарын тиімді басқару, тәуекелдерді бағалау және қаржылық резервтер қалыптастыру қабілеті бизнестің тұрақты дамуының негізгі факторларының біріне айналып отыр.