Мінезді бал: «Львовтар омартасы» «Қазақстанның үздік тауары» өңірлік байқауын қалай бағындырды
«Қазақстанның үздік тауары – 2026» өңірлік байқауының жеңімпаздарының бірі Ақмола облысы Ақкөл қаласындағы «Львовтар омартасы» жеке кәсіпкерлігі болды. Отбасылық кәсіпорын дәстүрлі омарташылықты, табиғи өнім өндіруді, апитерапияны және агротуризмді табысты ұштастырып келеді.
Омарта негізін қалаушы әрі жетекшісі Владимир Львов омарташылық саласына ұзақ жылдар бойы еңбек сіңірді. Бүгінде оның еңбегімен құрылған шаруашылық Ақмола облысынан тыс жерлерде де кеңінен танылып, өнімінің жоғары сапасы мен табиғатқа жанашыр көзқарасының арқасында тұтынушылардың сеніміне ие болды.
Омарта жұмысының басты ерекшелігі – көшпелі омарташылық. Маусым барысында ара ұялары Солтүстік Қазақстанның экологиялық таза өңірлеріне көшіріліп, аралар түрлі балды өсімдіктерден шырын жинайды. Соның нәтижесінде өзіндік дәмі, хош иісі және пайдалы қасиеттерімен ерекшеленетін табиғи балдың сан алуан түрі өндіріледі.
«Бүгінде «Львовтар омартасы» брендімен табиғи бал ғана емес, табиғи жидектер қосылған крем-бал, прополис, перга, ара тозаңы, балауыздан жасалған өнімдер, тұнбалар, жақпамайлар және ара шаруашылығының өзге де өнімдері шығарылады. Өндіріс барысында шикізаттың табиғи қасиеттерін сақтауға және өнім сапасын қатаң бақылауға ерекше көңіл бөлінеді», – дейді Владимир Львов.
Бүгінде омарта тек бал өндіретін кәсіпорын ғана емес. Мұнда апитерапия мен агротуризм бағыттары да қарқынды дамып келеді. Келушілер экскурсияларға қатысып, омарташының еңбегімен танысып, аралар әлемі туралы мол мағлұмат алып, өнімдердің дәмін татып, туристер арасында кең сұранысқа ие ара ұяларының үстіне орнатылған арнайы апиүйлерде тыныға алады.
Кәсіпорында экологиялық ағартушылыққа да ерекше мән беріледі. Омартаға балаларымен келген отбасылар, туристік топтар мен білім беру жобаларының қатысушылары тұрақты түрде келеді. Мұндай кездесулер омарташылықты, ауыл туризмін және табиғатқа ұқыпты қарауды насихаттауға ықпал етеді.
Өнім сапасының жоғары деңгейі халықаралық деңгейде де мойындалған. 2022 жылы Владимир Львов Италияда өткен Terra Madre халықаралық көрмесінде Қазақстанның омарташылық өнімдерін таныстырды. Кейін оның кәсіпкерлік жолы еліміздің 45 кәсіпкерінің өмір жолын біріктірген «TOLYQ ADAMNYŃ» кітабына енді.
Бүгінде «Львовтар омартасы» өнім сапасын, отбасылық дәстүрді, экологиялық жауапкершілікті және жаңа бағыттарды дамытуға басымдық бере отырып, қарқынды дамуын жалғастырып келеді.
«Қазақстанның үздік тауары – 2026» байқауындағы жеңіс Ақмола өңірі өндірушісінің өнімі жоғары сапа стандарттарына толық сәйкес келетінін және отандық өндірушілерді өңірлік әрі республикалық деңгейде ғана емес, халықаралық деңгейде де лайықты таныта алатынын тағы бір мәрте дәлелдеді», – деді Ақмола облысы Кәсіпкерлер палатасы директорының міндетін атқарушы Расул Сыздықов.