Диалогтан тікелей байланысқа. Жапония делегациясы Алматы бизнесімен танысты
«Атамекен» ӨКП алаңында Жапонияның іскерлік, сарапшылық және ғылыми орта өкілдері алматылық кәсіпкерлермен ынтымақтастық перспективалары мен өзара іс-қимылдың жаңа бағыттарын талқылады
Алматыда «Жаңа Жібек жолы – Орталық Азия» сапары аясында Жапонияның өкілді делегациясымен іскерлік кездесу өтті. Алматыдағы бағдарламаның негізгі алаңдарының бірі Алматы қаласының «Атамекен» Өңірлік кәсіпкерлер палатасы болды. Мұнда жапониялық қонақтар бизнес өкілдерімен кездесіп, тікелей іскерлік байланыстарды дамыту мүмкіндіктерін талқылады.
Делегация құрамына «Бір белдеу – бір жол» бастамасына жәрдемдесу жөніндегі Жапония-Қытай қауымдастығының, ғылыми-зерттеу институттарының, Жапония халықаралық ынтымақтастық агенттігінің (JICA), жоғары оқу орындары мен Жапонияның іскерлік орта өкілдері кірді. Қатысушылар қатарында Орталық Еуразиялық зерттеулер кеңесінің директорлар кеңесінің төрағасы Тэцудзи Танака, Жапония-Қытай жәрдемдесу қауымдастығының вице-төрағасы, Shimabun Corporation директорлар кеңесінің төрағасы Хироо Симада, Жапония-Қытай жәрдемдесу қауымдастығының өкілетті директоры Ёсикадзу Оно, Тоттори экологиялық зерттеулер қоғамдық университетінің профессоры Ясутоси Айкава және басқалар болды.
Кәсіпкерлер палатасында жапониялық делегацияны Алматы қаласы ӨКП директоры Чингисхан Маманов қарсы алды. Келіссөздерге көлік және экспедиция, логистика, өндіріс, жеңіл өнеркәсіп және бөлшек сауда салаларында жұмыс істейтін алматылық компаниялар мен бизнес-бірлестіктердің өкілдері қатысты.
Кездесуде екі ел компанияларының тікелей өзара іс-қимыл мүмкіндіктері, әлеуетті серіктестер іздеу, технологиялар мен құзыреттер алмасу, сондай-ақ бірлескен жобаларды іске асыру мәселелері талқыланды.
Чингисхан Маманов Алматы еліміздің ең ірі іскерлік орталығы ретінде кәсіпкерлердің халықаралық байланыстарын кеңейтуге және бизнеске жаңа нарықтарға, технологиялар мен серіктестік мүмкіндіктеріне жол ашатын практикалық ынтымақтастықты дамытуға мүдделі екенін атап өтті.
«Біз үшін мұндай кездесулердің нақты жалғасы болғаны маңызды. Палатаның міндеті – кәсіпкерлер бір-бірін тікелей тауып, нақты жобаларды талқылап, халықаралық диалогты шынайы іскерлік байланыстарға айналдыра алатын алаң қалыптастыру. Алматыда ауқымды әрі сан қырлы бизнес бар. Сондықтан біз жапониялық серіктестермен ынтымақтастықтың компаниялар мен бірлескен бастамалар деңгейінде дамуына мүдделіміз», – деді Чингисхан Маманов.
ӨКП-дағы іскерлік кездесудің алдында жапониялық делегация Алматының өндірістік әлеуетімен танысты. Қонақтар тігін және аяқ киім өндірісінің толық циклі бар жеңіл өнеркәсіп кәсіпорны – «Казлегпром-Алматы» ЖШС-не барды.
Кәсіпорын арнайы, формалық және азаматтық киім, сондай-ақ аяқ киім шығарады және кадр даярлаудың өзіндік жүйесін дамытып келеді. Кәсіпорын жанында «Шебер» оқу орталығы жұмыс істейді. Мұнда сала мамандары дуальды оқыту бағдарламалары бойынша даярлау және қайта даярлау курстарынан өтеді.
Алматыға сапар жапониялық делегацияның Қазақстандағы бағдарламасының жалғасы болды. Бір күн бұрын Астанада Ұлттық кәсіпкерлер палатасы «Атамекен» алаңында тараптар Қазақстан мен Жапония арасындағы сауда-экономикалық және инвестициялық ынтымақтастықты кеңейту, технологиялар тарту және компаниялар арасында тікелей байланыстарды дамыту перспективаларын талқылады.
Кездесу барысында ұсынылған деректерге сәйкес, 2025 жылы Қазақстан мен Жапония арасындағы тауар айналымы 1,8 млрд АҚШ долларына жетті. Қазақстанда жапон капиталының қатысуымен 68-ге жуық кәсіпорын жұмыс істейді. Тараптар машина жасау, көлік және логистика, цифрландыру, қаржы технологиялары, жасыл энергетика, жоғары технологиялық өндіріс пен инфрақұрылымды ынтымақтастықтың перспективалы бағыттары ретінде атап өтті.
Алматыдағы кездесу осы диалогтың өңірлік және кәсіпкерлік деңгейдегі жалғасы болды. Жапониялық делегация қаланың өндірістік әлеуетімен және жергілікті компаниялардың мүмкіндіктерімен тікелей танысып, екі елдің бизнес өкілдері өзара байланыстарды дамыту жолдарын талқылады.