Жауапсыз қалған шоттар: Ақтөбеде Кәсіпкерлер палатасы коммуналдық қызмет көрсетуші компаниямен дауда қоғамдық тамақтану нысандарының мүддесін қорғады

Ақтөбе облысында қоғамдық тамақтану субъектілері мен жергілікті қызмет көрсетуші «Aqtobe su energy group» арасында түсініспеушілік туындады. Мейрамхана және кафе иелері сарқынды сулардағы зиянды заттардың жол берілетін шекті концентрациясынан (ЖШК) асып кеткені үшін орта есеппен жарты миллион теңге және одан да жоғары көлемде қосымша төлем жасау туралы хабарламалар ала бастаған. Кәсіпкерлер бұл талаптардың негізділігіне күмән келтіреді. Себебі олар техникалық қызмет көрсету бойынша қызметтерді ай сайын төлеп, шарт аясында жұмыс істеп келеді.

Мәселе Ақтөбе облысының Кәсіпкерлер палатасы жанындағы Кәсіпкерлердің құқықтарын қорғау және сыбайлас жемқорлыққа қарсы іс-қимыл жөніндегі кеңес пен Туризм салалық кеңесінің прокуратура және мемлекеттік органдар өкілдерінің қатысуымен өткен бірлескен отырысында жан-жақты қаралды.

Даудың негізгі мәселесі – кәсіпкерлерге күтпеген жерден берілген, орта есеппен 400 мың теңгеден басталатын қосымша төлем туралы хабарламалар. Бизнес өкілдері бұл сомалардың есептелу тетігін түсініксіз деп санайды.

Заңнамаға сәйкес, қоғамдық тамақтану кәсіпорындары өндірістік сарқынды суларды, ең алдымен майлар мен өлшенген заттардан тазартуға және май ұстағыш құрылғылар орнатуға міндетті. Алайда коммуналдық кәсіпорынның сынама алу тәртібі мен қосымша төлем сомаларын есептеу әдістемесі бизнес-қоғамдастық тарапынан көптеген сұрақ туындатып отыр.

Ақтөбе облысы Кәсіпкерлер палатасы директорының орынбасары Руслан Куйшинов Палатаның негізгі міндеті – бизнеске негізсіз қысым көрсетілуіне және кәсіпкерлердің ұзаққа созылатын сот дауларына тартылуына жол бермеу екенін атап өтті.

«Біз «Aqtobe su energy group» компаниясының, мемлекеттік органдардың, прокуратура мен Кәсіпкерлер палатасының қатысуымен жеке кеңес өткіземіз. Бүгінде туындаған барлық мәселелерді егжей-тегжейлі талқылаймыз. Палатаның басты міндеті – бизнестің негізсіз түрде сот процестеріне және қосымша төлемдерге тартылуына жол бермеу. Сонымен қатар акционерлік қоғамнан алынған сынамалардың саны, анықталған бұзушылықтар және жүргізілген есептеулер бойынша статистиканы сұратамыз. Бүгінде бизнес субъектілерін қандай жағдай күтіп тұрғанын түсінуіміз керек. Біз бүкіл алгоритмді нақты білуіміз қажет: сынама алу, талдау жүргізу, зиянды заттардың жол берілетін концентрациясын анықтау, оның негізінде есептеу жүргізу, хабарлама беру, қайта талдау және қосымша төлем есептеу. Қазіргі таңда 400 мың теңге және одан да жоғары сомалардың қайдан шыққанын түсінбей отырмыз», – деді Руслан Куйшинов.

Өз кезегінде Кеңес төрағасы Абдухат Мырзалин бақылау рәсімі тек заң аясында жүргізілуі тиіс екенін атап өтті. Сонымен қатар кәсіпкерлерде объективті бақылау талдауын жүргізу үшін тәуелсіз зертханаларға жүгіну мүмкіндігі болуы қажет.

«Егер бұл зертхана «Aqtobe su energy group» ведомствосына қарайтын болса, бизнестің баламалы зертханаға жүгіну мүмкіндігі болуы керек. Яғни кәсіпкерлер сынамаларды қайта алу үшін басқа зертханаға өтініш бере алуы тиіс. Тіпті мәселе сотқа дейін жеткен жағдайда да, бізде объективтілікке негіз бар екенін түсінуіміз қажет», – деп атап өтті өңірлік Палатада.

Өз кезегінде бақылаушы органның өкілдері мен Кеңес басшылығы қызмет көрсетуші ұйымды мәселе толық реттеліп, өзара іс-қимылдың түсінікті алгоритмі әзірленгенге дейін жазалау шараларын қолдануды тоқтатуға шақырды.

Ақтөбе облысы Кәсіпкерлердің құқықтарын қорғау жөніндегі кеңестің төрағасы барлық мән-жай анықталғанға дейін санкциялар қолдануға мораторий енгізу қажеттігін қолдады.

«Осы нақты мәселе шешілгенге дейін қосымша төлемдерді есептеуден бас тартайық. Барлық осы хабарламалардың қолданылуы тоқтатылуы тиіс», – деп қорытындылады Абдухат Мырзалин.

Отырыстың қорытындысы бойынша айыппұл сипатындағы хабарламаларды беруді уақытша тоқтату, сынама алу тәртібіне тәуелсіз аудит жүргізу және Ақтөбе бизнесінің заңды құқықтарын қорғау мақсатында тараптардың тең өкілдік ету қағидатымен арнайы жұмыс кеңесін ұйымдастыру туралы шешім қабылданды.