Жаңа Құрылыс кодексі және бизнес кедергілері: Ақтауда құрылыс саласын дамыту мәселелері талқыланды
Ақтау қаласында «Атамекен» ҚР Ұлттық кәсіпкерлер палатасы Президиумының Құрылыс және тұрғын үй-коммуналдық шаруашылық комитетінің көшпелі отырысы өтті. Жиынға мемлекеттік сектордың, салалық бірлестіктердің өкілдері және Маңғыстау облысының құрылыс бизнесі қатысты.
Кездесудің негізгі тақырыптарының бірі – 2026 жылғы 1 шілдеден бастап күшіне енген Қазақстан Республикасының Құрылыс кодексін іс жүзінде қолдану мәселесі. Қатысушылар құрылыс саласын реттеудің жаңа тәсілдерін, өзін-өзі реттеу институтын дамыту, жобалау, сараптама, техникалық қадағалау мәселелерін және кәсіпкерлердің жұмысына тікелей әсер ететін басқа да өзгерістерді талқылады.
«Атамекен» ҚР Ұлттық кәсіпкерлер палатасы Президиумының Құрылыс және ТКШ комитетінің төрағасы Талант Омарбеков атап өткендей, Комитеттің негізгі міндеттерінің бірі – бизнес пен мемлекет арасында тұрақты диалог орнатып, саладағы проблемалық мәселелерді нақты шешімдерге айналдыру.
«Бүгінде құрылыс саласы елеулі өзгерістер кезеңінде тұр. Жаңа Құрылыс кодексінің күшіне енуі – жаңа нормалардың енгізілуімен ғана шектелмейді, сонымен қатар оларды қолданудың түсінікті әрі тиімді тетіктерін қалыптастыруды талап етеді. Біздің міндетіміз – бизнестің пікірін тыңдау, жүйелі кедергілерді анықтау және мемлекеттік органдармен бірлесіп, саланың тұрақты дамуына мүмкіндік беретін шешімдерді әзірлеу», – деді Талант Омарбеков.
Отырыста құрылыс саласындағы жүйелі мәселелерге де ерекше назар аударылды. Бұл мәселелерді «Атамекен» ҰКП республикалық деңгейде пысықтап келеді. Олардың қатарында тапсырыс берушілердің жобалау-сметалық құжаттаманы (ЖСҚ) әзірлеуге арналған конкурстарды жариялау кезінде баға белгілеу талаптарын сақтамауы, құрылыс саласы субъектілерін лицензиялау жүйесінің жетілдірілмеген тұстары, сондай-ақ техникалық қадағалау қызметтеріне ақы төлеу тетігін жетілдіру қажеттілігі бар.
Құрылыс және тұрғын үй-коммуналдық шаруашылық салаларындағы жауапкершілік мәселелеріне де жеке тоқталды. Құрылыс жобаларын іске асыру және объектілерді кейіннен пайдалану барысында олардың өмірлік циклінің әрбір кезеңінде – жобалаудан бастап құрылыс жұмыстарына, пайдалануға беруге, күтіп-ұстауға және қызмет көрсетуге дейін – барлық қатысушылардың жауапкершілік аясын нақты ажырату маңызды.
Тұрғын үй-коммуналдық шаруашылық саласында объектілердің тиісті техникалық жағдайын қамтамасыз ету, коммуналдық қызметтердің сапасы мен үздіксіздігін сақтау, сондай-ақ тиісті міндеттемелерді тиісінше орындамағаны үшін жауапкершілікті айқындау – маңызды мәселелердің бірі.
Маңғыстау облысы үшін жер қатынастарына, сондай-ақ құрылыс және инвестициялық жобаларды іске асыруға байланысты мәселелер ерекше маңызға ие. Өңірлік бизнес өкілдері проблемалық мәселелер мен өз ұсыныстарын Құрылыс және ТКШ комитетінің және салалық қоғамдастықтың өкілдеріне тікелей жеткізуге мүмкіндік алды.
Кездесу қорытындысы бойынша бизнес өкілдерінің ұсыныстары жүйеленіп, «Атамекен» ҰКП-ның уәкілетті мемлекеттік органдармен өзара іс-қимылы аясында одан әрі пысықталады.
Мұндай жұмыстың негізгі мақсаты – бизнес үшін болжамды жағдай қалыптастыру, артық әкімшілік жүктемені азайту және құрылыс саласының тұрақты дамуына қолайлы жағдай жасау.