Ақтөбеде бес экономикалық іс медиация арқылы шешілді
Ақтөбе облысының Кәсіпкерлер палатасы мен Ақтөбе облысының мамандандырылған ауданаралық экономикалық соты татуластыру рәсімдерін қолдану тәжірибесін дамытуда. Нақты нәтиже бар - бес азаматтық іс тараптардың өзара келісімімен бейбіт жолмен реттелді.
Ақтөбе облысының Кәсіпкерлер палатасы мен Ақтөбе облысының мамандандырылған ауданаралық экономикалық соты арасында жасалған өзара іс-қимыл туралы меморандум татуластыру рәсімдерін дамытуға, экономикалық дауларды сотқа дейінгі және соттан тыс реттеу тетіктерін жетілдіруге, ең бастысы, кәсіпкерлердің құқықтары мен заңды мүдделерін қорғауға бағытталған.
Бизнес үшін дауды ұзақ сот талқылауынсыз шешу - бұл уақыт пен қаржыны үнемдеу ғана емес. Бұл туындаған келіспеушіліктерге қарамастан, іскерлік қарым-қатынасты сақтап, ынтымақтастықты жалғастыруға мүмкіндік береді.
Меморандум аясында Ақтөбе облысының мамандандырылған ауданаралық экономикалық сотының өтініші бойынша Кәсіпкерлер палатасы татуластыру рәсімдерін қолдану арқылы қаралған бес азаматтық істің қаралуына қатысты. Бес істің барлығында тараптар өзара тиімді шешімге келіп, дауларды медиация тәртібімен бейбіт жолмен реттей алды.
Осындай мысалдардың бірі - кәсіпкерлік субъектісінің жеке кәсіпкер «Новикова А.С.» берешек пен тұрақсыздық айыбын өндіріп алу туралы талап арызы бойынша азаматтық іс.
Істі қарау барысында тараптарға дауды татуластыру рәсімі арқылы бейбіт жолмен реттеу мүмкіндігі ұсынылды. Ақтөбе облысының Кәсіпкерлер палатасы директорының құқықтық мәселелер жөніндегі орынбасары Руслан Күйшиновтың қатысуымен тараптар келіссөздер жүргізді. Нәтижесінде тараптар сотқа дейінгі хаттамаға қол қойып, дауды медиация тәртібімен реттеу туралы келісімге келді. Тараптар міндеттемелерді орындаудың өзара тиімді шарттары мен тәртібін айқындап, осылайша сот талқылауын одан әрі жалғастырудан бас тартты. Сот медиативтік келісімнің талаптарын қарап, олардың заңнама талаптарына қайшы келмейтінін және басқа тұлғалардың құқықтары мен заңды мүдделерін бұзбайтынын анықтады. Келісім бекітіліп, іс бойынша іс жүргізу тоқтатылды. Сонымен қатар, дау реттелуіне байланысты талапты қамтамасыз ету жөніндегі бұрын қабылданған шаралардың күші жойылды.
Бұл мысал татуластыру рәсімдерінің басты артықшылығын көрсетеді: кәсіпкерлер өзара келісіп, екі тарапқа да қолайлы шарттарды өздері айқындай алады және дауды толыққанды сот талқылауына жеткізбеуге мүмкіндік алады.
Кәсіпкер үшін өз құқықтарын қорғаумен қатар, іскерлік серіктеспен қалыптасқан қарым-қатынасты мүмкіндігінше сақтау да маңызды. Медиация тараптарға бір-бірін тыңдап, ортақ шешімге келуге мүмкіндік береді. Қолданыстағы тәжірибе бұл тәсілдің тиімді екенін көрсетіп отыр.
Жалпы, Кәсіпкерлер палатасы мен экономикалық соттың өзара іс-қимылы аясында қаралған бес азаматтық істің барлығы медиация арқылы бейбіт жолмен реттелді.
Кәсіпкерлер палатасының пікірінше, мұндай тәжірибені одан әрі дамыту экономикалық дауларды жедел шешуге, сот жүктемесін азайтуға және бизнес арасында сындарлы диалог мәдениетін қалыптастыруға ықпал етеді.
Кәсіпкерлер үшін бұл, ең алдымен, өз мүдделерін қорғаудың қосымша тетігі - дауды сот шешімі арқылы ғана емес, екі тарапқа да тиімді келісім арқылы шешіп, уақытты, ресурсты және іскерлік қарым-қатынасты сақтап қалу мүмкіндігі.
