Қазақстан мен Корея ТМТМ арқылы жүк ағындарын ұлғайтып, мультимодальды маршруттарды дамытуды көздейді
Қазақстан Республикасы Президентінің Корея Республикасына сапары аясында Сеулде «Қазақстан Республикасы – Корея Республикасы: Көлік және логистика» бизнес-форумы өтті. Іс-шара «Атамекен» ҚР ҰКП-ның қатысуымен ұйымдастырылды.
Форум екі елдің мемлекеттік және квазимемлекеттік құрылымдарының, көлік-логистика компаниялары мен бизнес өкілдерінен 70-ке жуық адамды қамтыды. Қазақстан тарапынан «Атамекен» ҰКП, ҚР Көлік министрлігі, «KTZ Express» АҚ, халықаралық әуежайлар, Middle Corridor Multimodal Ltd. және көлік, логистика, өнеркәсіп және қаржы секторларының өкілдері, Корея тарапынан Korea Airports Corporation, Korea National Railway, Korea Expressway Corporation, Incheon Port Authority, Busan Port Authority, Korean Air Cargo, LX Pantos, Hanjin Logistics, LG CNS және басқа компаниялар қатысты.
Форумның негізгі тақырыбы – әуе жүк және теміржол тасымалдарын дамыту, мультимодальды маршруттарды қалыптастыру, логистиканы цифрландыру және бірлескен инфрақұрылымдық жобаларды іске асыру бойынша практикалық ынтымақтастықты дамыту.
Қазақстан кореялық жүктерді Орталық Азия мен Еуропа нарықтарына шығаруға мүмкіндік беретін перспективалы құрлықтағы логистикалық хаб ретінде қарастырылады. Ал Корея порттық және авиациялық инфрақұрылым, логистика және жеткізу тізбектерін цифрлық басқару салаларындағы озық құзыреттерге ие.
«Бүгінде біздің алдымызда негіздемелік уағдаластықтардан нақты бірлескен жобаларды іске асыруға көшу міндеті тұр. Біз тасымал көлемін арттырып қана қоймай, бизнестің жылдамдық, құн және сенімділік талаптарына жауап беретін тұрақты жүк ағындары мен бәсекеге қабілетті логистикалық өнімдерді қалыптастыруымыз қажет», – деді «Атамекен» ҚР ҰКП Төралқа Төрағасы Қанат Шарлапаев.
Жүк тасымалдарын арттыру және әуе каргосын дамыту
2025 жылдың қорытындысы бойынша Қазақстан мен Корея арасындағы теміржол жүк тасымалдарының көлемі 117,8 мың тоннаны, оның ішінде 116,9 мың тонна транзиттік тасымалды құрады. 2026 жылдың алғашқы алты айында тасымал көлемі 43,7 мың тоннаға жетіп, толығымен транзиттік ағын есебінен жүзеге асырылды.
Қатысушылар жекелеген жөнелтімдерден тұрақты жүк сервистеріне көшу және тасымалданатын тауарлар номенклатурасын әртараптандыру қажеттігін атап өтті.
Әуе жүк тасымалын дамытуға да ерекше назар аударылды. Қолданыстағы құқықтық базаға сәйкес, аптасына 20-ға дейін жүк рейсін, оның ішінде әуе еркіндігінің бесінші дәрежесі құқықтарын пайдалана отырып орындау мүмкіндігі бар.
Екі ел арасындағы жолаушылар әуе қатынасы да өсіп келеді: қазіргі уақытта төрт бағыт бойынша аптасына 22 тұрақты рейс орындалады. Соңғы үш жылда рейстер саны 57%-ға – 14-тен 22-ге дейін артқан.
ТМТМ және мультимодальды тасымалдар
Форумның екінші сессиясы Транскаспий халықаралық көлік бағытын (ТМТМ) – Орта дәлізді дамытуға және мультимодальды байланысты күшейтуге арналды.
Тараптар теңіз, теміржол, автомобиль және әуе көлігін ықпалдастыру, Air+Rail, Air+Road және Sea+Rail модельдерін дамыту, терминалдық инфрақұрылымды жетілдіру және «ақылды» теміржол хабтарын құру мәселелерін талқылады.
Көлік процестерін цифрландыруға, терминалдарды автоматтандыруға және тасымалдардың жылдамдығын, ашықтығы мен болжамдылығын арттыруға ерекше назар аударылды.
«Қазақстан үшін ТМТМ – бұл тек транзиттік маршрут емес, заманауи көлік-логистикалық экожүйені қалыптастырудың негізі. Біз кореялық компаниялардың инфрақұрылымды жаңғыртуға, терминалдарды цифрландыруға, мультимодальды сервистерді дамытуға және бірлескен логистикалық өнімдер құруға қатысуына мүдделіміз», – деп атап өтті Қанат Шарлапаев.
Маршруттарды талқылаудан – нақты жобаларға
Форум аясында қазақстандық және кореялық компаниялар арасында құжаттарға қол қою рәсімі өтті. B2B кездесулер барысында кәсіпкерлер нақты маршруттарды, жүк номенклатурасын, инвестициялық жобаларды және ұзақ мерзімді ынтымақтастық мүмкіндіктерін талқылады.
Форум қорытындысы бойынша тараптар тұрақты жүк сервистерін қалыптастыру, мультимодальды маршруттарды дамыту, көлік процестерін цифрландыру және Қазақстанның көлік-логистикалық инфрақұрылымына кореялық технологиялар мен инвестицияларды тарту бағыттарындағы жұмысты жалғастыру қажеттігін атап өтті.
«Атамекен» ҰКП үшін форумның маңызды нәтижелерінің бірі – екі ел компаниялары арасындағы тікелей байланыстарды одан әрі дамыту және қол жеткізілген уағдаластықтарды нақты коммерциялық және инвестициялық жобаларға айналдыруға жәрдемдесу.