Қостанайлық бизнес тығырыққа тірелді: украиналық базальтты сертификаттау үшін кәсіпкерлерден кен орнын тексеру талап етіледі. Алайда геосаяси жағдайға байланысты сарапшылардың Украинаға баруы іс жүзінде мүмкін емес. Ведомстволар мәселені бір-біріне жолдап жатқанда, қымбат базальт партиясы кеденде рәсімделмей тұр. Бұл мәселені шешу жолдары Қостанай облысы Кәсіпкерлер палатасының өнеркәсіп мәселелері жөніндегі салалық кеңесінде талқыланды.

Қолданыстағы нормаларға сәйкес, табиғи тастан жасалған бұйымдарды сертификаттау үшін сарапшының тікелей өндірілетін жерге барып, кен орнын тексеруі қажет. Бизнес мұндай сапарды ұйымдастыруға дайын, алайда нысан Украина аумағында орналасқан және мамандар қауіпсіздікке қатысты сақталып отырған тәуекелдер жағдайында жұмыс істеуге дайын емес.

Біз Украинамен мемориалдық ескерткіштер жасауға арналған жоғары сапалы базальтты жеткізу бойынша 50 мың долларға келісімшарт жасадық. Қазір Қытайдан және басқа елдерден әкелінетін материалдың сапасы мұндай деңгейде емес. Тасты сатып алдық, Қазақстанға жеткізу де оңай болған жоқ. Бірақ қазір оны кедендік рәсімдеуден өткізе алмай отырмыз, себебі сертификат алу үшін сарапшы кен орнына барып, сол жерден сынама алуы керек. Не істерімізді білмейміз. Барлық ведомствоға хат жаздық, бірақ мәселе бойынша шешім әлі қабылданған жоқ, — деді кәсіпкер Наталья Сусаренко.

Кәсіпкерлер бұл мәселені бірнеше ай бойы шеше алмай келеді: метрология комитеті өнеркәсіп саласына жібереді, ал олар қайтадан метрологияға жолдайды. Бизнес кен орнын тексеруді қашықтан жүргізу мүмкіндігін қарастыруды ұсынып отыр.

Техникалық реттеу комитетінің бас сарапшысы Тәжібек Абайдың айтуынша, қашықтан бағалау тек карантин жағдайында қарастырылған.

Нормалар импорттаушыларға да, отандық өндірушілерге де бірыңғай талаптар белгілейді. Сондықтан қашықтан бағалауға рұқсат бере алмаймыз, — деп түсіндірді сарапшы.

«Атамекен» ҰКП өкілі Олжас Аязбаев қашықтан тексеру жүргізуге мүмкіндік беретін негіздер тізімін кеңейту туралы ұсыныс енгізуді ұсынды.

Біз әскери іс-қимылдарды форс-мажор жағдайы ретінде ерекшеліктер тізіміне енгізу жөнінде ұсыныстар пакетін дайындаймыз. Сондай-ақ ритуалдық мақсаттарға арналған тастарды техникалық регламенттің қолданылу аясынан алып тастауды ұсынамыз. Егер бастамамыз техникалық регламентті әзірлеуге және оған өзгерістер енгізуге бастамашы болған Тас өңдеу өнеркәсібі одағы тарапынан да қолдау тапса, мәселенің тығырықтан шығуына мүмкіндік туады, — деді Қостанай облысы Кәсіпкерлер палатасының салалық даму және инвестициялық жобаларды сүйемелдеу бөлімінің басшысы Роберт Юсупов.

Мәселе шешілгенше кәсіпкерлерге базальт партиясын «кеден қоймасы» кедендік рәсіміне орналастыру ұсынылды. Бұл тауарды Қазақстан аумағында екі жылға дейін сақтауға, оны жоюға немесе ел аумағынан тыс жерге шығаруға қажеттілікті болдырмауға мүмкіндік береді.

Сонымен қатар бұл уақытты нормативтік талаптарды өзгерту немесе сертификаттаудың басқа тетігін іздеу мүмкіндігі үшін пайдалануға болады.

Салалық кеңес реттеуші нормативтік базаға өзгерістер енгізу жөнінде «Атамекен» ҰКП-ға ұсыныстар әзірлеп жатыр.