Ақмола облысының құрылысшылары ТЖД-мен құжаттарды келісу тәртібін оңтайландыруды ұсынады
Ақмола облысының құрылыс саласының өкілдері әкімшілік кедергілерге тап болуда: нысандарды пайдалануға беру үшін азаматтық қорғау органдарының қорытындысын алу үлкен қиындыққа айналды. Бұл түйткіл Ақмола облысы Кәсіпкерлер палатасы жанындағы Құрылыс, құрылыс материалдарын өндіру және ТКШ салалық кеңесінің кезекті отырысында Мұхтар Есеновтің төрағалығымен талқыланды.
Ақмола облысының Өңірлік кәсіпкерлер палатасына құрылыс нысандары бойынша азаматтық қорғау органдарының қорытындысын алу мәселесіне қатысты бизнес субъектілерінен өтініштер жиі түсуде. Өңір құрылысшылары Ақмола облыстық Төтенше жағдайлар департаментінен (ТЖД) берілетін бас тартулардың жиілеп кеткеніне және олардың абстрактілі сипатына шағымданады. Ресми құжаттарда ТЖД ТЖМ-нің № 359 бұйрығына сілтеме жасап, «құжаттардың көшірмелері толық көлемде ұсынылмаған» деген стандартты жауаппен шектеледі. Бұл ретте ведомство әрбір нақты нысан бойынша қандай актілердің, паспорттардың немесе сертификаттардың жетіспейтінін нақтыламайды.
Салдарынан кәсіпкерлер қандай құжаттарды қосымша ұсыну қажеттігін түсінбей, тығырыққа тіреледі. Нәтижесінде құжаттарды қайта-қайта тапсыруға мәжбүр болып, алтынға бергісіз уақыт жоғалтады. Бұл жағдай өңір тұрғындарының өмір сүру сапасына тікелей әсер ететін әлеуметтік маңызы бар нысандардың да межелі мерзімде тапсырылуына кері әсерін тигізуде.
Жиында сонымен қатар Әкімшілік рәсімдік-процестік кодекстің нормаларын сақтау мәселесі де көтерілді. Заңнамаға сәйкес, кез келген әкімшілік акт негізді әрі дәлелді болуы тиіс. Бұл ретте кәсіпкердің нақты ескертпелер туралы алдын ала білуге, оларды жедел жоюға және белгіленген тәртіппен қажетті құжаттарды ұсынуға толық құқығы бар.
Кездесуге қатысқан Ақмола облысы ТЖД Техникалық нормалау бөлімінің бастығы, азаматтық қорғау подполковнигі Ниязбек Даутов ведомство ұстанымын түсіндіріп, мамандардың қолданыстағы ережелер мен бекітілген құжаттар тізбесі шеңберінде әрекет ететінін жеткізді.
Десе де, Өңірлік кәсіпкерлер палатасы құжаттарды қараудың бірыңғай, ашық әрі болжамды тәртібі қамтамасыз етілуі тиіс деп санайды. Ал қайта қарау барысы бұрынғы ескертпелер жойылған жағдайда жаңа талаптарды ойлап табу алаңына айналмауы қажет.
«Нақты әрі толық ескертпелер тізімі болмаса, бизнес пен мемлекеттік орган арасындағы диалог нәтижесіз әурешілікке айналады. Біздің міндетіміз — субъектілік сипат пен формальды жауаптардан арылу. Нақты әрі ашық алгоритм қажет: егер кемшіліктер болса, оларды бірден толық көрсетіп, бизнеске оларды жоюдың түсінікті жол картасын ұсыну керек. Нысандарды пайдалануға беруді негізсіз созуға болмайды», — деп атап өтті Ақмола облысы Кәсіпкерлер палатасы директорының орынбасары Расул Сыздықов.
Отырыс қорытындысы бойынша Салалық кеңес өкілетті органдарға ресми түсініктеме алу үшін жіберілетін сұрақтар топтамасын қалыптастырды. Кәсіпкерлер палатасы бұл мәселенің шешілуін өз бақылауына алды.