Ақмола бизнесі «Атамекеннің» Съезіне дайындалуда

​Ақмола облысы Кәсіпкерлер палатасы Өңірлік кеңесінің кезекті отырысында «Атамекен» ҰКП алдағы XIV Съезіне қатысатын негізгі делегация құрамы бекітіліп, республикалық деңгейде қаралатын жүйелі мәселелердің тізбесі талқыланды.

​Отырысты аша отырып, Ақмола облысы Кәсіпкерлер палатасы директорының міндетін атқарушы Ақылбек Смағұлов Ұлттық палатаның Съезінде өңір өкілдігін қалыптастырудың нормативтік талаптарын еске салды.

​«ҰКП туралы заңның 19-бабы 1-тармағына сәйкес Съезд ҰКП-да тіркелген республикалық қауымдастықтардың тең өкілдері мен Өңірлік кеңестер делегаттарынан құралады. Бізге Өңірлік кеңестен ақмолалық кәсіпкерлердің мүддесін уәжді түрде қорғайтын және өңірдегі шынайы жағдайды жеткізе алатын делегаттарды сайлау қажет», — деп атап өтті Ақылбек Смағұлов.

​Жиын барысында қатысушылар «Атамекен» ҰКП съезд алдындағы кездесуіне шығарылатын өңір кәсіпкерлерінің жүйелі түйткілдерін, сондай-ақ оларды шешудің нақты ұсыныстарын әзірлеу мен іздестіру мәселелерін егжей-тегжейлі талқылады.

Дауыс беру қорытындысы бойынша Өңірлік кеңестің 25 мүшесінің ішінен — оның құрамына 17 аудандық және 7 салалық кеңес өкілі, сондай-ақ ӨКП-да тіркелген Туристік қауымдастықтан бір делегат кіреді — 13 негізгі делегат пен резервке 7 кандидат сайланды.

​«Мәселелер өте күрделі. Съезд алдындағы алаңдардағы басты міндетіміз — тек олқылықтарды атап өту емес, оларды жоюдың дайын, тиімді тетіктерін ұсыну. Ақмола бизнесінің үні елордада айқын естілуі үшін делегаттар барынша бірлігі жарасқан топ болып жұмыс істеуі тиіс», — деп түйіндеді Өңірлік кеңес төрағасы Қуаныш Рақышев.

​Дайындалған бастамалар топтамасы мен делегация құрамы облыс атынан 2026 жылғы 25 қарашада Астана қаласында өтетін ҚР «Атамекен» ҰКП XIV Съезіне қатысады.