Enbek.kz жүйесіндегі хабарламалар ШҚО кәсіпкерлерін алаңдатты

Қазан айының басында Шығыс Қазақстан кәсіпкерлеріне Enbek.kz жүйесі арқылы хабарламалар келе бастады. Күтпеген хабарламалар бизнес өкілдері арасында көптеген сұрақтар мен алаңдаушылық туғызды: оларға шұғыл жауап беру қажет пе, айыппұл салына ма және енді жұмыс берушілер қандай қосымша мәліметтер ұсынуға міндетті? Осы мәселелер бойынша түсініктеме алу үшін кәсіпкерлер ШҚО Кәсіпкерлер палатасына жүгінді. Палата алаңында мемлекеттік еңбек инспекциясының өкілдерімен кездесу ұйымдастырылды.

ШҚО бойынша Мемлекеттік еңбек инспекциясы комитеті департаментінің өкілдері түсіндіргендей, келіп түскен хабарламаларға жауап беру талап етілмейді. Алайда оларда көрсетілген ақпаратты назардан тыс қалдыруға да болмайды.

Мамандардың айтуынша, егер жұмыс беруші қызметкерлер туралы нақты мәліметтер мен жүйеде көрсетілген деректер арасында сәйкессіздіктерді анықтаса, бұл ақпаратты назарға алып, тексеріп, қажет болған жағдайда деректерді сәйкестендіруі тиіс.

Кездесуге қатысушылар штат кестесіне қатысты мәселелерге ерекше назар аударды.

Еңбек инспекторлары қазіргі кезеңде кәсіпкерлерге ең алдымен штат кестесімен жұмыс істеу функционалы мен тәртібін зерделеу, жүйеде қандай мәліметтер көрсетілетінін және алдағы уақытта олармен қалай жұмыс істеу қажеттігін түсіну маңызды екенін түсіндірді.

Сонымен қатар ведомство өкілдері бизнесті алдын ала ақпараттандырудың маңыздылығын атап өтті. Қазіргі түсіндіру жұмыстарының негізгі мақсаты – жұмыс берушілерге алдағы өзгерістерге дайындалуға мүмкіндік беру. Бұл жаңа талаптардың кейін кәсіпкерлер үшін күтпеген жағдайға айналмауына және «бізге ешкім ескертпеді, түсіндірмеді» деген жағдайлардың туындамауына бағытталған.

Мемлекеттік мекемелер, мектептер және басқа да ұйымдар штат кестесімен жұмыс істеп жатқаны айтылды. Енді кәсіпкерлер үшін де тиісті тетіктерді біртіндеп меңгеру маңызды.

Талқыланған мәселелердің тағы бір бөлігі еңбек шарттарын есепке алудың бірыңғай жүйесінде (ЕШЕБЖ) тіркеуге қатысты болды.

Кәсіпкерлерге мәліметтерді енгізудің белгіленген мерзімдері еске салынды:

·         жаңа еңбек шарты 5 жұмыс күні ішінде тіркелуі тиіс;

·         еңбек шартына енгізілген өзгерістер мен толықтырулар 15 күнтізбелік күн ішінде тіркелуі қажет;

·         еңбек қатынастарының тоқтатылғаны туралы мәліметтер 3 жұмыс күні ішінде енгізілуі тиіс.

Кездесуде айтылғандай, биылғы жылдың 12 наурызынан бастап белгіленген талаптарды бұзғаны үшін айыппұл санкциялары қарастырылған. Сондықтан жұмыс берушілер үшін кадрлық құжаттарды уақытылы рәсімдеумен қатар, электрондық жүйедегі мәліметтердің дұрыстығын қадағалау да маңызды.

Кәсіпкерлер еңбек заңнамасын тәжірибеде қолдануға қатысты мәселелерге де белсенді қызығушылық танытты. Қызметкерді жұмысқа қабылдау кезінде қандай құжаттарды рәсімдеу қажет? Жұмыс уақытының режимін қалай дұрыс белгілеу және еңбекақыны қалай есептеу керек? Қызметкерлерді жұмыстан босату және еңбек шарттарын бұзу кезінде жұмыс берушілер қандай қателіктерге жол береді?

Сондай-ақ қызметкерлерді еңбек міндеттерін орындау кезінде жазатайым оқиғалардан міндетті сақтандыру шарттарын жасасу мәселелері жеке қаралды.

ШҚО Кәсіпкерлер палатасы директорының құқықтық мәселелер жөніндегі орынбасары Айжан Жангирханова мемлекеттік органдармен осындай тікелей диалог орнату кәсіпкерлер арасындағы артық алаңдаушылықты азайтуға, ықтимал заңбұзушылықтардың алдын алуға және жұмыс берушілерге өзгерістерге алдын ала дайындалуға мүмкіндік беретінін атап өтті. Оның айтуынша, кәсіпкерлердің жаңа талаптарды айыппұл алғаннан кейін емес, алдын ала түсініп, тиісті шараларды дер кезінде қабылдауы маңызды.