Алматыда құрылыстағы камералдық бақылауға қойылатын жаңа талаптар талқыланды
14 қазанда Алматы қаласы Кәсіпкерлер палатасының «Атамекен» ғимаратында Алматы қаласы бойынша Ішкі мемлекеттік аудит департаментінің қатысуымен семинар өтті. Негізгі тақырып құрылыс-монтаж жұмыстары шарттарының орындалуын камералдық бақылау және жаңартылған қағидаларды қолдану кезінде туындайтын практикалық мәселелер болды.
Іс-шараға Алматы қаласы бойынша Ішкі мемлекеттік аудит департаменті басшысының орынбасары Рустем Рамазанұлы, Департамент маманы Амангелді Көбенов, аудан әкімдіктерінің қаржы-шаруашылық бөлімдерінің басшылары, құрылыс компанияларының заңгерлері мен бухгалтерлері қатысты. Кездесуді Алматы қаласы Кәсіпкерлер палатасы «Атамекен» директорының орынбасары Жанна Мурзакулова жүргізді.
Камералдық бақылау құрылыс нысанына бармай-ақ, мемлекеттік сатып алуларға қатысты құжаттар мен мәліметтерді тексеруді көздейді. Қатысушыларға жаңартылған қағидаларға сәйкес оны жүргізу тәртібі мен шеңбері, сондай-ақ анықталған бұзушылықтарды жою үшін қажетті құжаттарға қойылатын талаптар түсіндірілді.
Құрылыс-монтаж жұмыстары шарттарының орындалуын тексеру кезінде қолданылатын № 28 тәуекел бейініне ерекше назар аударылды. Мемлекеттік аудит өкілдері растайтын құжаттарды ұсыну, қажет болған жағдайда актіні кері қайтарып алу және қосымша электрондық шот-фактураны рәсімдеу тәртібін түсіндірді.
Жұмыстардың бір бөлігін қосалқы мердігер орындаған, ал жекелеген тауарлардың, жұмыстардың немесе көрсетілетін қызметтердің сатып алынғанын растайтын құжаттар болмаған жағдайлар да жеке қаралды. Мұндай жағдайларда қатысушыларға тиісті жұмыс көлемдерінің қосалқы мердігерге берілгенін растайтын шартты ұсыну арқылы бұзушылықтарды жою мүмкіндігі түсіндірілді.
Бюджет қаражатын игеру мерзімдерін сақтау да талқыланған тақырыптардың бірі болды. Тапсырыс берушілерге камералдық бақылау жүргізуге қажетті уақытты ескере отырып, орындалған жұмыстар актілерін алдын ала растау ұсынылды. Бұл тәсіл шарттарды орындау және есеп айырысу кезінде кідірістердің туындау тәуекелін азайтуға мүмкіндік береді.
«Атамекен» Кәсіпкерлер палатасы үшін кездесудің маңызды міндеттерінің бірі құрылыс бизнесінің практикалық мәселелерін талқылау болды. Кәсіпкерлер мемлекеттік аудит өкілдеріне сұрақ қойып, мемлекеттік келісімшарттарды орындау кезінде туындайтын қиындықтарды атап өтуге мүмкіндік алды.
Алматы Кәсіпкерлер палатасы бақылау тетіктерін қолдану кезінде бизнестің мүдделерін ескеру мақсатында уәкілетті мемлекеттік органдармен өзара іс-қимылды жалғастырады. Қосымша түсіндіруді қажет ететін сұрақтар мен ұсыныстар ҚР Қаржы министрлігінің Ішкі мемлекеттік аудит комитетімен одан әрі пысықтауға жолданады.