Жастар бастамалары мен IT-жобалар: Мұрат Қарымсақов Болгарияның Жастар және спорт министрімен кездесті
София қаласында Қазақстанның Сыртқы сауда палатасының Басқарма төрағасы Мұрат Қарымсақовтың жұмыс сапары аясында Болгария Республикасының Жастар және спорт министрі Энчо Керязовпен кездесу өтті.
Кездесуде жастар және спорт саласындағы байланыстарды нығайту, жастар кәсіпкерлігін қолдау және инновациялар саласындағы ынтымақтастықты дамыту перспективалары талқыланды.
Мұрат Қарымсақов экономикалық және инвестициялық жобалардың негізінде адамдар тұрғанын, ал жас мамандарды халықаралық ынтымақтастыққа тарту технологиялық бизнесті дамытуға жаңа мүмкіндіктер ашатынын атап өтті.
«Біздің жастарымыз әлемдік деңгейде өздерін танытып келеді. Астанада өткен жасанды интеллект бойынша хакатон 2415 жас IT-маманды біріктіріп, Гиннестің әлемдік рекордын орнатты. Қазақстандық оқушылар математика, физика және химия пәндері бойынша халықаралық олимпиадаларда жоғары марапаттарға ие болып жүр. Дәл осы жастар Қазақстанның ғылымды қажет ететін экономикасының болашағын қалыптастырады», – деді ол.
Жастар арасындағы өзара іс-қимылдың әлеуетіне тоқталған ҚССП Басқарма төрағасы Болгариядағы бастамаларды да атап өтті. Атап айтқанда, инновациялар, жасыл экономика және Еуропаның бәсекеге қабілеттілігі мәселелеріне арналған Софиядағы GTF Youth Forum, сондай-ақ шығармашыл жастарды біріктіретін Бургастағы Teen Boom Fest фестиваліне назар аударды.
Кездесуге Bugin Holding компаниясының негізін қалаушы әрі директоры Айбек Қуатбаев қатысты. Мұрат Қарымсақов холдингтің IT-шешімдер мен цифрлық өнімдер саласындағы қызметін таныстырып, болгариялық серіктестермен бірлескен жобаларды жүзеге асыру мүмкіндіктерін атап өтті.
ҚССП Басқарма төрағасы Энчо Керязовтың дарынды балаларды қолдау мен жастар бастамаларын дамытуға қосқан жеке үлесін де жоғары бағалады. Ол Қазақстан мен Болгария арасындағы әріптестікті нығайту үшін жас кәсіпкерлер, технологиялық компаниялар және спорт қауымдастығы арасындағы тікелей байланыстардың маңыздылығын атап өтті.
Кездесу соңында Мұрат Қарымсақов болгар тарапына жылы қабылдауы үшін алғыс айтып, екі ел арасындағы іскерлік және гуманитарлық байланыстарды одан әрі дамытуға мүдделілік білдірді.