Жылусыз қалған стоматология: Өскеменде бизнес пен МИБ арасындағы дау шектен шықты

Далада қар жауып, жылыту маусымы басталғанына қарамастан, Өскемен қаласындағы «Аль-Дента» ЖШС стоматологиясы әлі күнге дейін жылусыз отыр және пациенттерді қабылдай алмай отыр. Шығыс Қазақстан облысы Кәсіпкерлер палатасының араласуына, уәкілетті органдарға бірнеше мәрте жүгінуге, тіпті арнайы комиссияның оқиға орнына шығуына қарамастан, мүлік иелерінің бірлестігімен (МИБ) және басқарушы компаниямен арадағы дау әлі шешілген жоқ.

Бұл ретте МИБ тарапынан қойылып отырған талап біреу ғана — кәсіпкер негізділігіне күмән келтіріп отырған берешекті өтеу.

 Бұған дейін аталған мәселе ШҚО Кәсіпкерлер палатасының Кәсіпкерлердің құқықтарын қорғау және сыбайлас жемқорлыққа қарсы іс-қимыл жөніндегі кеңесінің отырысында қаралған болатын. Алайда содан бері жағдай одан әрі күрделене түсті: қаржылық дау медициналық мекеменің жұмысын іс жүзінде тоқтатуға әкелді.

 Кәсіпкердің түсіндіруінше, «Аль-Дента» ЖШС ұзақ уақыт бойы ұсынылған шоттар бойынша төлем жасап, басқарушы компанияның талаптарын орындап келген. Алайда шарттық қатынастар тиісті түрде рәсімделмеген. Оның үстіне, кәсіпкер ұсынған құжаттарға сәйкес, төлемдер басқарушы компания көрсеткен жеке тұлғалардың шоттарына аударылған.

 Мәселе тексеру барысында туындаған. Шарттар мен тиісті бухгалтерлік құжаттардың болмауына байланысты кәсіпкер жұмсалған қаражатты құжат жүзінде растай алмаған. Осыдан кейін кәсіпорын мәселе реттелгенге дейін төлемдерді уақытша тоқтатқан. Енді МИБ жинақталған берешекті өтеуді талап етіп отыр.

 Бірақ егер берешек шынымен бар болса, неге бұл мәселе заңда белгіленген тәртіппен шешілмейді? Неліктен қаржылық келіспеушілік кәсіпкерлік қызметтің іс жүзінде тоқтауына әкелуі тиіс?

 21 қазанда тұрғын үй инспекциясы өкілдерінің қатысуымен арнайы комиссия нысанға барып, жағдаймен танысты. Алайда комиссияның келуінен кейін де ештеңе өзгерген жоқ. МИБ өкілдері мәлімделген берешек өтелмейінше, мәселені шешуден тағы да бас тартты.

 Осылайша, қисынға сыймайтын жағдай қалыптасып отыр: кәсіпкер өз құқықтарын қорғау үшін бірнеше рет жүгінеді, уәкілетті мамандар нысанға барады, мәселе түрлі алаңдарда талқыланады, бірақ стоматология әлі күнге дейін жылусыз отыр.

Тұрғын үй инспекциясының ұстанымы да бірқатар сұрақ туғызады. «Аль-Дента» ЖШС МИБ пен «ЖЭК № 6» басқарушы компаниясы әрекеттерінің заңдылығын тексеру туралы бірнеше рет өтініш білдірген. Алайда инспекцияның түсіндіруінше, тексеру жүргізуге негіз жоқ.

 Осы ретте заңды сұрақ туындайды: кәсіпкерлік қызметке іс жүзінде кедергі келтіріліп отырған жағдайда, тіпті уәкілетті органның өзі тексеру жүргізуге негіз таппаса, кәсіпкердің құқығын кім қорғайды?

 ШҚО Кәсіпкерлер палатасында атап өткендей, бизнес ортақ мүлікті күтіп-ұстауға байланысты заңды міндеттемелерден бас тартпайды. Алайда қаржылық талаптар негізді, ашық әрі тиісті құжаттармен расталуы тиіс. Ал төлемдерге қатысты дау кәсіпкерге қысым көрсету құралына айналмауы керек.

 Бұл қақтығыстың салдары — стоматология жұмысының тоқтауы, пациенттерді қабылдау мүмкіндігінің болмауы және кәсіпорынның қаржылық шығынға ұшырауы. Сонымен қатар бұл жағдай көппәтерлі тұрғын үйлердің тұрғын емес үй-жайларында жұмыс істейтін басқа кәсіпкерлер үшін де қауіпті прецедентке айналуы мүмкін.

ШҚО Кәсіпкерлер палатасы аталған мәселемен айналысуды жалғастырып, дауға қатысушылардың әрекеттеріне құқықтық баға беруді, қаржылық талаптардың негізділігін тексеруді және стоматологияның қалыпты жұмысын қалпына келтіруді талап етіп отыр.

 Ал тараптар берешек мәселесін даулап, уәкілетті органдар араласуға негіз таппай жатқанда, стоматология әлі де жылусыз отыр. Күн суытқан сайын шешілмеген мәселенің бизнеске келтіретін залалы да арта түсуде.