Ақмола облысында кәсіпкерлер кәсіби мерекелерін атап өтті
Ақмола облысы Кәсіпкерлер палатасының алаңында Қазақстан кәсіпкерлері күніне арналған салтанатты шара өтті.
Еске салсақ, 29 қазан ресми түрде кәсіби мереке — Қазақстан кәсіпкерлері күні болып бекітілген (ҚР Еңбек және халықты әлеуметтік қорғау министрлігінің тиісті бұйрығына 2025 жылғы 30 шілдеде қол қойылған). Бұл датаның таңдалуы маңызды тарихи оқиғамен байланысты: 2015 жылғы 29 қазанда ҚР Кәсіпкерлік кодексі қабылданған болатын. Құжат бизнес, инвестиция, бәсекелестік және мемлекеттік бақылау салаларындағы басты заңнамалық актілерді біріктіріп, кәсіпкерлікті қолдаудың бірыңғай мемлекеттік саясатының негізін қалады.
«Бүгінгі таңда кәсіпкерлік — ұлттық экономиканың басты қозғаушы күші, ал өңіріміздің бизнес өкілдері қол жеткізген жетістіктер айрықша құрметке лайық. Әрбір жүзеге асырылған жоба мен бастаманың артында зор еңбек, жоғары кәсібилік және өз ісіне деген адалдық жатыр. Кәсіпкер болу — жай ғана кесте бойынша жұмыс істеу емес, бұл — тұрақты жауапкершілік, тәуекелге бара білу, басқалар қиындық көретін жерден шешім таба алу және күн сайын өз ісін алға жылжыту», — деп атап өтті құттықтау сөзінде Өңірлік кеңестің төрағасы Қуаныш Ракишев.
Мерекелік бағдарлама аясында «Атамекен» ҚР ҰКП басшылығының атынан бизнес-қоғамдастық өкілдері мен Өңірлік палата қызметкерлерін марапаттау рәсімі өтті. III дәрежелі «Ісіне адалдығы үшін» медалімен «Блэк» ЖШС атқарушы директоры Роман Никитенко марапатталды. «Атамекен» ҰКП Төралқа төрағасы Қанат Шарлапаевтың атынан Құрмет грамотасымен және Алғыс хатпен «Авикс Групп» ЖШС директоры Максим Зайцев пен «Соколов Р.О.» ЖК жетекшісі Руслан Соколов марапатталды.
Кездесуге қатысушылардың ерекше назары «Заң мен тәртіп» тұжырымдамасы аясында жүзеге асырылып жатқан республикалық «Адал кәсіпкер» акциясының барысына аударылды.
«Үкімет 2025–2030 жылдарға арналған қоғамда заң мен тәртіп идеологиясын ілгерілету жөніндегі тұжырымдаманы бекітті. Оның шеңберінде адал бизнесті ынталандыруға бағытталған «Адал кәсіпкер» акциясы өткізілуде. Жоба ашық бизнес жүргізуді ынталандыруға, салық және еңбек заңнамасын сақтау мәдениетін қалыптастыруға, әлеуметтік жауапкершілік пен мемлекеттік институттарға деген сенімді арттыруға, сондай-ақ субсидиялар мен гранттар алу кезінде жауапты кәсіпкерлерге преференциялар беруге арналған», — деді Өңірлік палата директорының орынбасары Расул Сыздықов.
ӨКП жанынан арнайы құрылған конкурстық комиссия «Үлгілі салық төлеуші», «Әлеуметтік жауапты жұмыс беруші», «Қауіпсіз өндіріс», «Мемлекеттің сенімді серіктесі» және «Қоғамдық сенім мен ашық диалог көшбасшысы» номинациялары бойынша 14 жеңімпазды анықтады.
«Кәсіпкерлер күні — күнтізбедегі қатардағы дата емес, бұл — сіздердің күнделікті еңбектеріңізге деген теңдессіз құрметтің белгісі. Біз Ақмола облысының бизнесі жаңа өндіріс орындарын ашып, халықты жұмыспен қамтамасыз ете отырып, серпінді дамып келе жатқанын көріп отырмыз. Президент кешегі Жолдауында кәсіпкерлер үшін максималды қолайлы жағдай жасауды нақты басымдық ретінде белгіледі. Бұл 2027 жылдан бастап тексерулерге енгізілетін жаңа мораторий бастамасына да, отандық өндірушілерді қатаң қорғауға да қатысты. Мемлекеттің басты бағыты — бизнес өсімін ынталандыру және кез келген әкімшілік кедергілерді жою. Біздің ортақ міндетіміз — адал, ашық жұмыс курсын жалғастыру және өңір экономикасын бірге нығайту», — деп түйіндеді сөзін Ақмола облысы Кәсіпкерлер палатасы директорының міндетін атқарушы Ақылбек Смағұлов.