Тіл орталығынан әлеуметтік кәсіпкерлікке дейін: ШҚО Кәсіпкерлер палатасы бизнестің дамуына қалай көмектесуде
Бір кездері Өскемен қаласындағы Banana Mama шағын тіл үйрету орталығы болатын. Бүгінде ол балаларға, соның ішінде ерекше білім беру қажеттіліктері бар балаларға кешенді көмек көрсететін сөйлеу тілін түзету және дамыту орталығына айналды. Мұндай өзгерістің артында кәсіпкердің бастамасы мен ата-аналар тарапынан сұраныстың артуы ғана емес, Шығыс Қазақстан облысы Кәсіпкерлер палатасының жан-жақты қолдауы да тұр. Енді орталық келесі маңызды қадамға – әлеуметтік кәсіпкерлік субъектілерінің тізіліміне енуге дайындалуда.
Banana Mama тарихы – шағын бизнестің көрсетілетін қызмет түрлерін кеңейтіп қана қоймай, қызмет бағытын біртіндеп өзгертіп, өзінің әлеуметтік миссиясын айқындап, Кәсіпкерлер палатасының қолдауымен дами алатынының жарқын мысалы.
Бастапқыда Banana Mama тіл үйрету орталығы ретінде жұмыс істеді. Алайда уақыт өте келе орталық басшылығы жаңа бағытты – логопедиялық көмек көрсету мен сөйлеу тілін түзетуді дамытуды қолға алды. Қызметтің бір форматынан екіншісіне көшу бірқатар ұйымдастырушылық мәселелерді шешуді талап етті.
Осы кезеңде кәсіпкер ШҚО Кәсіпкерлер палатасына жүгінді. Палата мамандары жобаны жан-жақты сүйемелдеуді қамтамасыз етті. Олар жаңа қызмет бағытын дамыту мәселелері бойынша консультациялық және практикалық қолдау көрсетіп, кәсіпкерге қажетті ұйымдастырушылық кезеңдерден өтуге және логопедиялық орталық форматында жұмысты жолға қоюға көмектесті.
Осылайша, Кәсіпкерлер палатасының сүйемелдеуімен Banana Mama тіл үйрету орталығы сөйлеу тілін түзету және дамытуға маманданған орталыққа айналды.
Алайда орталықтың дамуы мұнымен тоқтаған жоқ. Тәжірибе көрсеткендей, балалардың қажеттіліктері мен ата-аналардың сұраныстары көбіне логопедиялық сабақтар аясынан әлдеқайда кең.
«Біз жұмысымызды тіл үйрету орталығы ретінде бастадық. Кейін логопедиялық бағытты дамытуды шештік. Осы кезеңде Кәсіпкерлер палатасы бізге үлкен қолдау көрсетті. Палата мамандары жаңа жұмыс форматына көшу барысында жан-жақты сүйемелдеді. Бірақ уақыт өте келе көптеген балаларға бір ғана маманның көмегі жеткіліксіз екенін түсіндік. Сөйлеу тіліндегі қиындықтардың артында сенсорлық даму, мінез-құлық, қимыл-қозғалыс және қарым-қатынас ерекшеліктері жатуы мүмкін. Ата-аналар әртүрлі мамандарды өздері іздеп, олардың ұсынымдарын өзара үйлестіруге мәжбүр болатын. Сондықтан бала барлық қажетті кешенді көмекті бір жерден алуы үшін мамандар құрамын кеңейтуді шештік», – дейді Banana Mama орталығының басшысы.
Бүгінде орталықта логопедтер, логопед-дефектологтар, қолданбалы мінез-құлықты талдау (ABA) маманы, дефектолог, сондай-ақ бейімделген дене шынықтыру және сенсорлық интеграция нұсқаушысы жұмыс істейді.
Мұндай тәсіл сөйлеу тіліндегі бұзылыстармен ғана емес, баланың мінез-құлқы, қарым-қатынас дағдылары, моторикасы, қимыл-қозғалыс үйлесімділігі, сенсорлық дамуы және әлеуметтік дағдыларын қалыптастыру мәселелерімен де жұмыс істеуге мүмкіндік береді.
Жеке тәсілді және бірнеше маманның бірлескен сүйемелдеуін қажет ететін ерекше білім беру қажеттіліктері бар балаларға айрықша көңіл бөлінеді.
Орталықтың жаңа бағыттарының бірі – «Точка старта» жобасы. Ол үш жастан жеті жасқа дейінгі балаларға арналған және екі бағыттың бірі бойынша – логопед-дефектологтың немесе бейімделген дене шынықтыру және сенсорлық интеграция нұсқаушысының диагностикасынан өтуді көздейді.
Диагностика нәтижесінде ата-аналар баланың қандай дағдыларына қосымша назар аудару қажеттігі және алдағы уақытта қандай мамандардың көмегі қажет болуы мүмкін екені жөнінде ұсынымдар алады.
Сонымен қатар, Banana Mama ШҚО Кәсіпкерлер палатасымен бірлесіп, дамудың жаңа кезеңіне – әлеуметтік кәсіпкерлік субъектілерінің тізіліміне енуге дайындалуда.
Палата мамандары кәсіпкерге тізілімге енгізілуге дайындық мәселелері бойынша сүйемелдеу көрсетіп, белгіленген талаптар мен қажетті рәсімдер жөнінде кеңес беруде.
Орталық үшін бұл жай ғана жаңа мәртебе алу мүмкіндігі емес, таңдалған қызмет бағытының заңды жалғасы.
ШҚО Кәсіпкерлер палатасында бизнесті қолдау тек кеңес берумен немесе бір ғана нақты мәселені шешумен шектелмеуі тиіс екенін атап өтеді. Кәсіпкерді дамудың әртүрлі кезеңдерінде сүйемелдеу, жаңа жағдайларға бейімделуге көмектесу және одан әрі өсу мүмкіндіктерін табуға қолдау көрсету маңызды.
Заңнамада белгіленген талаптар сақталған жағдайда, әлеуметтік кәсіпкерлік субъектілерінің тізіліміне енгізілу орталықтың одан әрі дамуына қосымша мүмкіндіктер ашуы мүмкін. Оның ішінде мемлекеттік қолдаудың көзделген шараларына қол жеткізу мүмкіндігі де бар.
Banana Mama тарихы бизнестің әлеуметтік бағыты міндетті түрде құрылған сәтінен бастап қалыптаса бермейтінін көрсетеді. Кейде ол жұмыс тәжірибесі, клиенттердің қажеттіліктерін терең түсіну және кәсіпкердің қалыптасқан қызмет моделін өзгертуге деген дайындығы арқылы біртіндеп айқындалады.