Мемлекет пен бизнес – тікелей байланыста
Мемлекет пен бизнес – тікелей байланыста
Бүгін Алматы қаласы кәсіпкерлер палатасында білім беру және денсаулық сақтау саласындағы салалық кеңестің отырысы өтті. Отырысқа кеңес төрайымы Эльмира Түгелбайқызы Әуезова модераторлық етті. Ол соңғы апталарда Палатаға салық заңнамасындағы өзгерістерге алаңдаушылық білдірген кәсіпкерлерден көптеген өтініштер мен сұрақтар келіп түскенін атап өтті.
«Бізге күн сайын жаңа Салық кодексінің нормаларын түсіну қиындық тудырып отырған кәсіпкерлер хабарласады. Көпшілігі: не өзгерді, есептілікті енді қалай дұрыс жүргізу керек, жеке және заңды тұлғаларға қандай талаптар қойылады — деген сұрақтар қояды», — деді Эльмира Әуезова.
Оның айтуынша, кәсіпкерлердің алаңдаушылығын азайтып, мәселелерге нақты жауап алу мүмкіндігін қамтамасыз ету мақсатында, Палата Алматы қаласы бойынша Мемлекеттік кірістер департаментінің өкілдерін арнайы шақырған.
Спикерлер қатарында:
— Департамент басшысының орынбасары Азат Омаров,
— Дара кәсіпкерлер мен жеке тұлғаларды әкімшілендіру басқармасының басшысы Нұрлыбек Успанов,
— Камералдық мониторинг бөлімінің басшысы Данияр Талғат,
— Бостандық ауданы бойынша басқарма басшысының орынбасары Айжан Албаева болды.
«Біз кездесуді мүмкіндігінше тәжірибеге жақын форматта өткіздік – тікелей диалог, нақты жағдайлар мен мысалдар талқыланды. Салық органдарының өкілдері кәсіпкерлердің барлық сұрақтарына жауап берді, яғни шын мәнінде конструктивті әңгіме болды деуге болады», — деп атап өтті Әуезова.
Талқылау барысында қатысушылар ортақ пікірге келді: даулы немесе түсініксіз жағдай туындаған кезде кәсіпкерлер мемлекеттік органдармен байланыс орнату үшін Палатаға жүгіне алады. «Бүгін біз ең бастысына келістік: мемлекет пен бизнес – байланыста. Егер кәсіпкерлерде салық немесе реттеу мәселелері бойынша сұрақтар туындаса, біз тиісті құрылымдарға ресми сауал жолдап, ресми түсіндірме алуымызға дайынбыз. Бұл – нағыз кері байланыс», — деп түйіндеді кездесуді модератор.